Япон Улсын Кюшү Их Сургууль, Хиросаки Их Сургууль, Хоккайдогийн Их Сургууль болон Япон Улсын Мэс заслын нийгэмлэг хамтарсан “Ази Тивийн орнуудад алсын зайн Теле мэс засал”-ийг хөгжүүлэх, Хоол боловсруулах эрхтэний хорт хавдрын дурангийн мэс заслын эмч нарыг сургах дадлагажуулах 3 жилийн төсөл Монгол Улсад амжилттай эхэллээ.

Уг төслийн хүрээнд Япон Улсын дээрхи 3 Их Сургуулиас төрөлжсөн нарийн мэргэжлийн мэс засал, дуран, дүрс оношлогоо, эмнэлзүйн эмгэг судлаач эмч нарын 13 хүний бүрэлдэхүүнтэй баг АШУҮИС-ийн Монгол-Япон эмнэлэгт ажиллан ходоод, бүдүүн гэдэс, болон улаан хоолойн хавдартай нийт 8 үйлчлүүлэгчдэд дурангаар салст хуулах болон дурангийн мэс заслыг Монгол-Японы эмнэлгийн эмч нартай амжилттай хамтран гүйцэтгэлээ.

АШУҮИС-ийн ректор, доктор профессор Б.Дамдиндорж Япон улстай хамтран хэрэгжүүлж буй төслийн багийн гишүүдийг хүлээн авч уулзан амжилт хүсэв.

Тус төсөл 3 жилийн хугацаанд хэрэгжих бөгөөд жил бүр Монгол-Японы эмнэлгийн мэс заслын тасгийн эмч нарыг Япон улсын их сургуулийн эмнэлэгт томилон, ходоод, бүдүүн гэдэс тайрах болон хэвлийн хөндийн мэс заслын чиглэлээр нарийн мэргэшүүлж, мэргэжил дээшлүүлэх юм.

Төслийн хүрээнд Монгол Улсад теле мэс заслыг амжилттай нэвтрүүлэх бөгөөд үүний үр дүнд АШУҮИС-ийн Монгол-Японы эмнэлгээс алслагдсан аймаг, орон нутгийн эмнэлгүүдэд хийгдэж буй хорт хавдрын дурангийн мэс засалд “Real-time” буюу шууд хугацаанд алсын зайнаас зөвлөгөө өгөх, хамтран ажиллах боломж бүрдэх юм.

Энэхүү хамтын ажиллагаа нь орон нутгийн эмч нарын ур чадварыг нэмэгдүүлэх, оношлогоо, эмчилгээний чанарыг сайжруулах, улмаар хорт хавдрын тусламж үйлчилгээний хүртээмжийг нэмэгдүүлэхэд чухал ач холбогдолтой юм.