Засгийн газрын Хяналт хэрэгжүүлэх газрын дарга Ч.Өнөрбаяр, Нийгмийн даатгалын ерөнхий газрын дарга Б.Батжаргал, Улсын хоёрдугаар төв эмнэлгийн захирал Б.Бямбадорж, Монголын Бүтээмжийн Төвийн гүйцэтгэх захирал Я.Эрхэмбаяр нар /2025.04.07/ өдөр “Төрийн байгууллагын төгөлдөршил, загвар байгууллагын төсөл” хамтран ажиллах гурван талт гэрээнд гарын үсэг зурлаа.

Энэхүү төслийг хэрэгжүүлснээр Төрийн байгууллагуудын үйл ажиллагааг илүү үр дүнтэй, иргэдэд ээлтэй, ил тод болгоход чухал хувь нэмэр оруулахын зэрэгцээ Монгол Улсад сайн засаглалыг төлөвшүүлэхэд бодит дэмжлэг үзүүлэх юм.

Засгийн газрын Хяналт хэрэгжүүлэх газар нь төрийн байгууллагын үйл ажиллагаанд процессын дахин инженерчлэл хийх, сайн засаглалыг төлөвшүүлэх, бүтээмжийг нэмэгдүүлэх чиглэлээр мэргэжлийн болон арга зүйн удирдлагаар хангах үүрэгтэй.

Энэхүү ажлын хүрээнд Засгийн газрын Хяналт хэрэгжүүлэх газар, Монголын Бүтээмжийн Төвтэй хамтран төрийн байгууллагын үйл ажиллагааг төгөлдөршүүлэх, тасралтгүй сайжруулалтыг төлөвлөж, бүтээмж, чанарыг дээшлүүлэх арга хэмжээг системтэйгээр хэрэгжүүлэх, улмаар олон улсын түвшинд жишиг болохуйц загвар байгууллагыг бий болгох төслийн бэлтгэл ажлыг ханган ажиллаж байна.

Азийн Бүтээмжийн Байгууллага, Монголын Бүтээмжийн Төвтэй хамтран хэрэгжүүлэх энэхүү төсөлд Нийгмийн даатгалын Ерөнхий газар, Нийслэлийн Засаг даргын Тамгын газар, Улсын хоёрдугаар төв эмнэлэгт сонгогдон төсөл хэрэгжихээр болсон. Төслийг хэрэгжүүлснээр төрийн албаны бүтээмж, үйлчилгээний чанар сайжирч, тасралтгүй сайжруулалтын соёл төлөвшихөөс гадна туршлагаа түгээн дэлгэрүүлэх юм.