Улсын Хоёрдугаар төв эмнэлэг нь гадаад харилцаагаа өргөжүүлэх, бусад орны эмнэлгүүдтэй хамтран ажиллах ажлыг өргөн хүрээнд зохион байгуулдаг.

Тэгвэл энэ ажлын нэг болох 2020 оноос БНСУ-ын Канбук Самсунг эмнэлэгтэй хамтарч “KOFIH” төслийг эхлүүлсэн бөгөөд төслийн хаалтын үйл ажиллагаа болон хамтын ажиллагааны самбар гардуулах, өндөр өртөгт тоног төхөөрөмжийг хандивлах ёслолын үйл ажиллагаа өнөөдөр боллоо.

Тус үйл ажиллагаанд УХТЭ-ийн Ерөнхий захирал Б.Бямбадорж, Кангбук Самсунг эмнэлгийн Ирээдүйн эрүүл мэндийн төвийн удирдах газрын дарга Кан Жэ Хон, “KOFIH” төслийн ерөнхий нарийн бичгийн дарга Пэк Гван Пэк болон УХТЭ-ийн тасаг нэгжийн дарга нар оролцлоо.

Энэ үеэр УХТЭ-ийн Ерөнхий захирал Б.Бямбасүрэн хэлсэн үгэндээ “БНСУ-ын Канбук Самсунг эмнэлгээс төслийн хугацаанд Монгол иргэдийн эрүүл мэндийн төлөө нийт 3.626.000$-ийн хөрөнгө оруулалт хийсэн. Тус хөрөнгө оруулалтаар бид иргэдэд эрүүл мэндийн чанартай, хүртээмжтэй тусламж, үйлчилгээг үзүүлэх зорилгоор Үндэсний оношилгоо, эмчилгээний төвд 10 удаагийн 62 ширхэг тоног төхөөрөмжийг авч, эмчилгээ, үйлчилгээндээ бүрэн нэвтрүүлсэн.

Үүнээс гадна эмч, мэргэжилтнүүдэд зориулсан урилгат сургалтад 43  зочин ирж сургалт зохион байгуулж, туршлага судлах гадаад сургалтад нийт 54 эмч, эмнэлгийн мэргэжилтнийг хамруулсан. Эмч, эмнэлгийн мэргэжилтнийг чадавхжуулах тасралтгүй сургалтыг зохион байгуулж давхардсан тоогоор 3520 эмнэлгийн мэргэжилтэн сургалтад хамрагдсан.” гэдгийг энэ үеэр онцоллоо.

“KOFIH” төслийн ерөнхий нарийн бичгийн дарга Пэк Гван Пэк:

KOFIH байгууллага нь 2016 оноос хойш УХТЭ-тэй хамтран ажиллаж байна. Бид өнгөрсөн хугацаанд эмнэлгийн цөмийн тасгийн үйл ажиллагааны төсөл, эмнэлгийн үйл ажиллагааг сайжруулах төсөл зэрэг олон төслийг хамтран амжилттай хэрэгжүүлсэн. Өнөөдөр бид дээрх төслийн үр дүнтэйгээ танилцаж цаашид хэрхэн хамтарч ажиллах тал дээр ярилцлаа.

Төсөл таван жилийн хугацаанд хэрэгжихдээ олон монгол иргэдийн эрүүл мэндэд үнэтэй хувь нэмэр оруулсан гэж итгэж байна. Цаашид УХТЭ-тэй нийгмийн эрүүл мэндийн чиглэлээр эмнэлгийн тусламж үйлчилгээг сайжруулах, ард иргэдэд эрүүл мэндийн боловсрол олгох зарим нэгэн шаардлагатай эрүүл мэндийн оношилгооны тусламж үйлчилгээг хиймэл оюун ухаанд тулгуурлан үзүүлэх тусламж үзүүлэх, нэвтрүүлэхээр хамтран ажиллах болно.

Энэ үеэр “KOFIH” байгууллагаас эмнэлгийн үйл ажиллагааг сайжруулах зорилгоор хамгийн сүүлийн үеийн Olympus загварын дурангийн мэс заслын тоног төхөөрөмжийг хандивлалаа.