Монгол Улсын Ерөнхийлөгчийн тамгын газраас санаачлан хэрэгжүүлж буй “Эрүүл Монгол хүн” хөтөлбөрийн хүрээнд ЕБС-ийн эрүүл мэндийн хичээлийг заах багш бэлтгэх хөтөлбөрийг сайжруулах, элсэлтийг нэмэгдүүлэх зорилгоор “Багш, Эрүүл мэндийн боловсрол, Арга зүй” хөтөлбөрийг баталсан.

Энэ хүрээнд АШУҮИС, МУБИС хамтран Эрүүл мэндийн багш, эрүүл мэндийн арга зүйчийг Япон Улсын туршлагаар бэлтгэх сургалтыг өнөөдөр эхлүүлж, талууд хамтран ажиллах санамж бичгийг байгууллаа.

Тус үйл ажиллагаанд Ерөнхийлөгчийн тамгын газрын Эрүүл Монгол хүн төсөл хариуцсан албаны дарга О.Чимидсүрэн, АШУҮИС-ийн ректор Б.Дамдиндорж, МУБИС-ийн ректор Ж.Батбаатар болон бусад албаныхан оролцлоо.

АШУҮИС-ийн ректор Б.Дамдиндорж:

Монгол Улсын Ерөнхийлөгчийн тамгын газраас “Эрүүл Монгол хүн” хөтөлбөрийг хэрэгжүүлж байгаа бөгөөд монгол хүний эрүүл мэндийг цогцоор нь хамгаалах, төсөл хөтөлбөр хэрэгжүүлэх, эрүүл мэндэд сөргөөр нөлөөлж буй хүчин зүйлүүдийг судлах, урьдчилан сэргийлэх талаар цогц бодлого юм.

Монгол Улсын хүн амын дундах нас баралтын тэргүүлэх шалтгаанд амьдралын буруу хэв маяг нөлөөлөх нь их байна. Тиймээс хүүхдэд бага наснаас нь буюу цэцэрлэгт байхаас нь эхэлж эрүүл мэндийн боловсролыг зааж, эрүүл эмьдралын хэв маягийг заах хэрэгтэй. Үүнийг хүүхдүүдэд заах хүмүүс бол багш нар юм.

АШУҮИС нь МУБИС-тай хамтран эрүүл мэндийн багш бэлтгэх хөтөлбөрийг эхлүүлж байна. Ингэснээр хүүхдүүдэд эрүүл мэндийн боловсролыг цогцоор нь олгох боломж нээгдэж байна.

МУБИС-ийн ректор Ж.Батбаатар:

Хүүхэд залуучуудад эрүүл мэндийн боловсрол маш чухал байна. Тиймээс энэ тал дээр анхаарч, эрүүл мэндийн багш, арга зүйчийг бэлтгэх хөтөлбөрийг шинэчлэн хамтран хэрэгжүүлэх санамж бичгийг байгууллаа. Нийгэмд чанартай сайн боловсон хүчнийг бэлтгэх нь их сургуулиудын үүрэг бөгөөд манай хоёр сургууль энэ тал дээр анхаарч, хамтран эрүүл мэндийн багшийг бэлтгэх болсондоо баяртай байна. Энэ жилээс эхэлж элсэлтээ авч эхлэх бөгөөд АШУҮИС-тай хамтран хөтөлбөрийг хэрэгжүүлснээр илүү их судалгаатай, нарийн мэргэжлийн профессоруудтай хамтран ажиллах юм. Ингэснээр энэ чиглэлээр төгсөж буй оюутнуудын чанар сайжирна гэж харж байгаа”

Эрүүл ирээдүйг бий болгохын тулд хүүхдүүдэд бага наснаас нь эрүүл мэндийн боловсролыг олгоно.