“Төрийн бүтээмжийн сэргэлт-Цахим эрүүл мэнд“ сургалтад Ховд аймгийн эрүүл мэндийн салбарынхан хамрагдаж эхэллээ

ЦХХХЯ, ЭМЯ-аас эрүүл мэндийн салбарын хууль эрх зүйн шинэчлэл болон мэдээллийн технологийн дэвшлийг ашиглан эрүүл мэндийн тусламж үйлчилгээний чанарыг сайжруулах, иргэдэд учрах чирэгдлийг бууруулах талаар төрөөс баримталж буй бодлого чиглэлийг эрүүл мэндийн салбарын ажилтан, албан хаагчдад танилцуулах “Төрийн бүтээмжийн сэргэлт-Цахим эрүүл мэнд” сургалтыг  энэ сарын 4-ний өдрөөс эхлүүлсэн.

Энэ хүрээнд нийслэл болон аймгуудын эрүүл мэндийн салбарынханд үе шаттай сургалт зохион байгуулах бөгөөд эдгээр өдрүүдэд Эрүүл мэндийн дэд сайд С.Энхболдоор ахлуулсан ажлын хэсэг Говь-Алтай, Ховд, Увс аймагт ажиллаж, эрүүл мэндийн салбарын цахим үйлчилгээний нэгдсэн системийг танилцуулж, санал солилцож, мэдээлэл өгч ажиллаж байгаа.

Өнөөдөр тус сургалтад Ховд аймгийн эрүүл мэндийн салбарынхан хамрагдаж байна.

Эрүүл мэндийн дэд сайд С.Энхболд  төрийн бүтээмжийн сэргэлтэд зайлшгүй шаардлагатай зүйл нь төрөөс үзүүлэх үйлчилгээг цахимжуулах цахим шилжилт гэдгийг онцлоод “ Эрүүл мэндийн салбарын цахим шилжилтийг эрчимжүүлж, иргэдэд  эрүүл мэндийн тусламж үйлчилгээг ойртуулах,  чанарыг сайжруулах, иргэдэд учрах чирэгдлийг бууруулах чиглэлээр МУ-ын Засгийн газраас ЭМЯ, ЦХХХЯ-нд тодорхой чиглэлүүдийг өгсөн. Энэ хүрээнд орон нутгийн эрүүл мэндийн салбарын албан хаагчдад шинэчлэл хийгдсэн программ хангамжуудын талаар мэдээлэл өгөх,   мөн эрүүл мэндийн салбарт хэрэгжсэн хууль эрх зүйн болон сүүлийн 3 жилийн хугацаанд хийгдсэн бодлого, шийдвэрүүдийн хэрэгжилтийн үр дүнг танилцуулах сургалтыг зохион байгуулж байна. 

Цахим эрүүл мэнд шинэчлэлийн хүрээнд ЭМЯ, ЦХХЯ-нас хамтран төрийн цахим үйлчилгээний нэгдсэн систем И-Монгол-д эрүүл мэндийн салбарын 20 гаруй үйлчилгээг оруулсан. Хамгийн сүүлд гэхэд эрүүл мэндийн нэн шаардлагатай  7 төрлийн тусламж, үйлчилгээг цахим хэлбэрт бүрэн шилжүүлж, заримыг нь хэрэглээнд нэвтрүүлээд байна.

Тухайлбал, эмийн жор, дүрс оношилгооны дүгнэлт, шинжилгээний хариу, хүүхдийн урьдчилан сэргийлэх тарилгын гэрчилгээ, амбулаториор эмчлүүлэгчдийн карт, жирэмсэн эмэгтэйн хяналтын картыг нэвтрүүлсэн. Ингэснээр иргэн эмнэлэгт үзүүлсний дараа шинжилгээний хариуг заавал өөрийн биеэр очиж авах шаардлагагүй, гар утаснаас харах боломж бүрдсэн.  " хэмээсэн юм.

Ховд аймгийн засаг дарга Э.Болормаа " Засгийн газраа санаачлан “Төрийн бүтээмжийн сэргэлт-Цахим эрүүл мэнд“ сургалтыг 21 аймаг, 9 дүүрэг зохион байгуулахаар төлөвлөн, өнөөдөр Ховд аймагт зохион байгуулагдаж байгаад баяртай байна.

Ховд аймаг  цахим шилжилтийн хувьд хөдөө орон нутгийн хэмжээнд  2012 онд манлайлан Дүрс оношилгооны төв цахим мэдээллийн санг анх удаа нэвтрүүлсэн сайн туршлагатай. Тиймээс эрүүл мэндийн салбарын энэхүү цахим шилжилтийг цаашид үр дүнтэй болгон гэдэгт итгэлтэй байна.

Миний зүгээс Ерөнхий сайдын ажлын албаны дарга байх хугацаанд шинэ сэргэлтийн бодлогыг ахалж боловсруулж байсан. Төрийн бүтээмжийн сэргэлтийг яагаад эдийн засгийн бодлого руу оруулж байсан вэ гэвэл өнөөдөр төр засгийн бодлогыг гол хөдөлгөх хүч болох төрийн албан хаагчдын бүтээмж, цаашлаад нийгмийн баталгаа, ажиллах орчин нөхцөлийг бүрдүүлэх хамгийн чухал гэж авч үзсэн. Өнөөдөр цахим шилжилтийг бүх салбарт хийж байна. Үүний үр дүнд эрүүл мэндийн салбарын ажилтнуудын ажлын ажлыг бууруулах, үндсэн ажлыг хийлгэх боломжийг болгох, бичиг цаасны ажлыг багасгах үр дүнтэй юм" гэв.