Эмийн үнийн өсөлтийн шалтгаан, нөхцөлийг хянан шалгах түр хорооны нотлох баримтыг шинжлэн судлах сонсгол хоёр дахь өдрөө үргэлжилж байна. 

Өчигдрийн хуралдаанаар Монгол Улсын эм зүйн салбарын өнөөгийн нөхцөл байдал ба тулгамдаж буй асуудал, зайлшгүй шаардлагатай болон хөнгөлөлттэй эмийн зохицуулалт, зайлшгүй шаардлагатай эмийн жагсаалтад албан тушаалтан нөлөөлсөн байдал зэрэг асуудлыг хэлэлцсэн юм. 

Энэ үеэр ажлын хэсгээс Л-Карнитин буюу тураах үйлчилгээтэй эмийг уналт таталттай хүүхдэд хэрэглэж байна гэсэн асуудлыг тавиад байсан.  

Энэ талаар Эрүүл мэндийн дэд сайд С.Энхболд тодруулахад "Уналт таталттай хүүхдэд өргөн хэрэглэгддэг вольпраны хүчил эмийг эмчийн заалтаар хэрэглэдэг. Энэ эмийг хэрэглэх үед эмийн бодис биед ихээр хуримтлагдах, элэгний эсийг гэмтээх тохиолдол гарах нь бий. Тиймээс Л-Карнитин эмийг хавсарч хэрэглэдэг. Тус эм нь вольпраны хүчил эмийн бодисын хэт хуримтлал үүсэх болон элэг гэмтээх сөрөг нөлөөллийг бууруулах, хамгаалах үйлдэлтэй. Тус эмийг 10 хайрцаг буюу 600 ширхэг, уусмалаар арван хайрцгийг нэг удаагийн лицензээр нэг удаа оруулсан. 

Үүнээс гадна Л-Карнитин эм нь бодисын солилцоог идэвхжүүлэх замаар тураах үйлдэл үзүүлдэг тул илүүдэл жинг бууруулах зорилгоор мөн хэрэглэдэг." хэмээлээ.