Эх Хүүхдийн Эрүүл Мэндийн Үндэсний төв нь сувилагчийн дутагдалтай орон тоог гүйцээхийн тулд олон ажлыг хэрэгжүүлж байгаа бөгөөд өнгөрсөн жилээс эхлэн шинээр төгссөн залуу сувилагч нарт зориулсан "Ажлын гарааг ЭХЭМҮТ-өөс" уриатай гурван сая төгрөгийн тэтгэлэгт хөтөлбөр зарлаж, 27 сувилагчийг эгнээндээ нэгтгэсэн юм. 

Энэ онд тус тэтгэлэгт хөтөлбөрийг үргэлжлүүлэх бөгөөд энэ хүрээнд өнөөдөр ЭХЭМҮТ-ийн Ерөнхий захирал Ш.Алтантуяа АШУҮИС-ийн Сувилахуйн сургуулийн төгсөх дамжааны оюутнуудтай уулзалт хийж, ЭХЭМҮТ-д ажиллах хүсэлт гаргасан 20 оюутанд батламж гардууллаа. 

Энэ үеэр ЭХЭМҮТ-ийн Ерөнхий захирал Ш.Алтантуяа хэлсэн үгэндээ "Дэлхий нийтэд сувилагчийн орон тооны хомсдол их яригдах болсон. Манай эмнэлэгт ч мөн энэ асуудал яригдаж байгаа бөгөөд бид хүний нөөцийн хомсдолыг арилгах үүднээс олон ажлыг хийж хэрэгжүүлж байна. Үүний нэг бол жил бүр зохион байгуулагддаг АШУҮИС-ийн Сувилахуйн сургуульд суралцаж буй төгсөх дамжааны оюутнуудтай хийх уулзалтыг өнөөдөр зохион байгууллаа. Уулзалтын үеэр манай эмнэлэгт ажиллах хүсэлт гаргасан найман оюутанд батламжийг нь гардуулан өглөө. Үүнээс гадна бид хүний нөөцийг хөгжүүлэх, нотолгоонд суурилсан сувилахуйн тусламж, үйлчилгээг эрчимжүүлэх зорилгоор "Ажлын гарааг ЭХЭМҮТ-өөс" уриатай тэтгэлэгт хөтөлбөрийг зарлаж, 27 сувилагч, эх баригч уг хөтөлбөрийн дагуу бидний эгнээнд шилжээд байна. Бид сувилагч нарын ажиллах нөхцлийг сайжруулах, нийгмийн асуудлыг шийдвэрлэх, чадавхжуулах тал дээр анхаарч ажиллаж байна." гэдгийг энэ үеэр онцоллоо. 

Тус үйл ажиллагаанд ЭХЭМҮТ-ийн Ерөнхий захирал Ш.Алтантуяа, ЭХЭМҮТ-ийн дэд захирал Т.Болормаа, АШУҮИС-ийн Сувилагчийн сургуулийн төгсөх дамжааны оюутнууд оролцсон юм. 

АШУҮИС-ийн Сувилахуйн сургуулийн төгсөх дамжааны оюутан А.Долгор: 

ЭХЭМҮТ-д ажиллахаар сонгосон шалтгаан маань хамгийн анх уртын дадлагаа Нярайн эмгэг судлалын тасагт хийх явцад хамт олон нь маш гоё хүлээж авсан. Үүнээс гадна ийм том хамт олны нэг хэсэг болж ажиллах надад их ирээдүйтэй санагдсан учраас тус эмнэлэгт ажиллах хүсэлт өгч, өнөөдөр ийнхүү батламжаа гардаж аваад байна. 

Анх их эмч болно гэж боддог байсан ч Сувилахуйн сургуульдаа суралцаад төгсөх явцдаа энэ мэргэжлийн үнэ цэнийг мэдэрч, цаашид ажиллах чин хүсэл сонирхолтой болсон.