Эх Хүүхдийн Эрүүл Мэндийн Үндэсний төвийн Ерөнхий захирал Ш.Алтантуяагаас тус эмнэлэгт хийгдэж буй хөрөнгө оруулалтын талаар тодрууллаа. Тэрээр "Эх Хүүхдийн Эрүүл Мэндийн Үндэсний төвд эх, хүүхдийн эрүүл мэндийг хамгаалах зорилгоор Монгол Улсын Засгийн газраас хөрөнгө оруулалтуудыг маш ихээр хийж байгаа. 

Ерөнхий сайд Л.Оюун-Эрдэнэ манай төвд ажиллах үеэрээ иж бүрэн засвар хийхээ амласан бөгөөд энэ хүрээнд 66 тэрбум төгрөгийн хөрөнгө оруулалтыг хийсэн. 

Тус хөрөнгө оруулалтаар бид мэс засал, төрөх эмнэлэг, төрсний дараах тасаг гэсэн гурван блокыг иж бүрэн засварлаад байна. Мөн хүүхдийн яаралтай тусламжийн блокын засварын ажил 90 хувьтай явж байна.

Үүнээс гадна төрөх эмнэлгийн дөрвөн давхар барилгыг ашиглалтад оруулахад бэлэн болж, улсын комисс хүлээн авсан бол хүүхдийн эмнэлгийн амбулаторын зургаан давхар барилгын ажил 60 хувьтай явж байна. Ирэх 07 дугаар сард ашиглалтад оруулна.

Мөн ажилчдын хүүхдүүдийг сургах цэцэрлэгийн барилгын ажил явагдаж байна. Энэ мэт маш олон бүтээн байгуулалтын ажлууд ЭХЭМҮТ-д хийгдэж байна. 

Үүнээс гадна бид эмч, мэргэжилтнүүдийг чадавхжуулах тал дээр анхаарч, өнгөрсөн онд 85 эмч, мэргэжилтнүүдийг гадны өндөр хөгжилтэй оронд туршлага судлах, мэргэшүүлэх сургалтанд хамруулсан бол сувилагч нарын орон тоог нэмэгдүүлэх, тэдний ажиллах нөхцлийг сайжруулах зорилгоор "Шинэ сувилагч" төслийг эхлүүлж, манай төвд ажилд орсон сувилагчид нэг удаад гурван сая төгрөгийн буцалтгүй тэтгэмжийг олгосон. Ингэснээр бид 27 сувилагчаар хүний нөөцөө өргөтгөсөн. Энэ төслийг энэ ондоо дахин үргэлжлүүлнэ." гэдгийг онцоллоо.