Эх Хүүхдийн Эрүүл Мэндийн Үндэсний төв нь их засварын ажлыг эхлүүлээд байгаа билээ. Үүний нэг болох Төрөх эмнэлгийн Төрсний дараах тасагт иж бүрэн засвар хийж 2023 оны 12 дугаар сард ашиглалтад оруулжээ. 

Энэ талаар тус тасгийн эрхлэгч Ж.Саранцэцэг хэлэхдээ "ЭХЭМҮТ-ийн Төрсний дараах тасагт өдөртөө 100 гаруй ээж амаржиж ирдэг. Өмнө нь жижиг жижиг засварууд хийгддэг байсан ч энэ жилийнх шиг иж бүрэн засвар хийгдэж байгаагүй. Тус засвар хийгдсэнээр эх, нярай тав тухтай байх нөхцөл бүрдсэн. 

Төрсний дараах тасгийн засвар өнгөрсөн оны 05 дугаар сараас эхэлж 12 дугаар сард дуусгасан. Засварын хүрээнд агааржуулалтын систем бүрэн шинэчлэгдэж, сантехник, мэдээлэл холбоо, дохиоллын системүүд, хүчилтөрөгчийн оролтууд хийгдсэн. 

Үүнээс гадна гэр бүлээрээ байх орчныг бүрдүүлэх үүднээс долоон орыг тохижуулсан. Өөрөөр хэлбэл төрсөн ээж хажуудаа ар гэрээсээ хүн оруулж, асруулах бүрэн боломжтой болсон. Ингэснээр амаржсан эх хурдан тэнхрэх боломжтой юм." хэмээлээ.