Дунд сургуулийн сурагчдын шүд амны хөндийн эрүүл мэндийн боловсролыг дээшлүүлэх, шүд угаах зөв аргачлалыг эзэмшүүлэх, шүд угаахын ач холбогдлыг олон нийтэд таниулах, сурталчлах зорилгоор уламжлал болгон зохион байгуулагддаг “Шүд угаалтын аварга” шалгаруулах тэмцээн өнөөдөр “Өнөр бүл” хүүхдийн төвд болж байна.

Тэмцээнд дөрвөн асрамж, халамжийн төвийн 18 багийн 108 хүүхэд оролцож байна.

Тэмцээний үйл ажиллагааг нээж, Эрүүл мэндийн дэд сайд С.Энхболд хэлсэн үгэндээ “Монгол Улсын Засгийн газар, Эрүүл мэндийн яамнаас улс орон даяар урьдчилан сэргийлэх, эрт илрүүлэг, үзлэг, шинжилгээ, оношилгоог зохион байгуулах ажлыг өнгөрсөн оны тавдугаар сараас эхлүүлсэн. Уг эрт илрүүлэгт хамрагдсан нийт иргэдийн 86,7 хувь нь шүд цоорох өвчтэй нь тогтоогдсон. Тэр дундаа 0-17 настай хүүхдүүдийн шүдний цооролтын өвчлөл 90 хувьтай байгаа нь энэ тал дээр анхаарал хандуулах цаг болсныг илтгэж байна.

Тиймээс Засгийн газраас энэ тал дээр арга хэмжээ авч ажиллах үүргийг Эрүүл мэндийн яаманд өгч, өнгөрсөн наймдугаар сард 322-р тогтоол буюу “Эрүүл Шүд” арга хэмжээг хэрэгжүүлэхээр болсон. Энэхүү “Эрүүл шүд” арга хэмжээгээрээ дамжуулан хүүхдүүдэд багаас нь  шүд, амны хөндийн эрүүл мэндийн талаарх мэдлэг, мэдээллийг үнэн, зөв өгч, дадал хэвшлийг суулгах юм. Өнгөрсөн гурван сарын хугацаанд ЭМЯ орон нутгийн захиргаа, мэргэжлийн ТББ-уудтай хамтран Өмнөговь, Өвөрхангай, Төв аймаг, Орхон аймгуудад “Шүд Угаалтын Аварга Шалгаруулах Тэмцээн-2023”-ийг амжилттай зохион байгууллаа. Уг арга хэмжээнд нийт 680 хүүхэд, 160 орчим багш хамрагдаж, 250 орчим шүүгч зохион байгуулагч нарыг бэлтгэсэн байна. Эдгээр хүүхэд, багш нар тэмцээнд оролцож, шүд амны хөндийн эрүүл мэнд, шүд арчилгааны талаар бүрэн мэдлэг, хандлага, дадалтай болоод зогсохгүй ЭМЯ-ны “Эрүүл мэндийн элч” болон томилогдож, үе тэнгийнхэндээ, сургуулийнхаа хүүхдүүд, багш, эцэг эхчүүд, ах дүү нартаа эрүүл мэндийн талаар хичээл орж, олон төрлийн нөлөөлийн ажлуудыг хийж байгаа билээ.” хэмээлээ.

"Өнөр бүл хүүхдийн төвд зохион байгуулагдаж буй Шүд угаалтын аварга шалгаруулах тэмцээнд нийт дөрвөн асрамж, халамжийн төвийн 18 багийн 108 хүүхэд оролцож байна. Энэ тэмцээнийг зохион байгуулах санаачилгыг гаргасан Эрүүл мэндийн яам, АШУҮИС-ийн Нүүр ам судлалын сургууль, Шүдний холбоо зэрэг олон байгууллагуудын дэмжлэгтэйгээр тус тэмцээнийг зохион байгуулж байна. Хүүхдүүдийн хувьд сүүлийн 14 хоногт энэ тэмцээндээ бэлдэж оролцож байна. Уг тэмцээнээр дамжуулан шүдээ хэрхэн зөв угаах, ямар бүтээгдэхүүнийг хэрхэн хэрэглэх, бусдад үлгэрлэх зэрэг маш олон дадлыг өөрийн болгож байна. Манай төв 2018 оноос эхлэн шүдний кабинетийг байгуулан ажиллаж эхэлсэн бөгөөд тус кабинетаараа дамжуулан хүүхдүүдийнхээ шүдний эрүүл мэндийг сахин хамгаалдаг. Шүдний кабинетыг байгуулснаар манай хүүхдүүдийн 80 гаруй хувьд нь эрүүл шүдтэй болсон. Хүүхдүүд өдөр тутамдаа шүдний эмчдээ үзүүлээд, эмчилгээгээ хийлгээд явж байна.” гэдгийг "Өнөр бүл" хүүхдийн төвийн Ерөнхий захирал М.Өлзийчимэг онцолж байлаа.

Тэмцээн өртөөчилсөн байдлаар зохион байгуулагдаж, 2-5 дугаар өртөөний нийлбэр оноогоор тэргүүлсэн гурван багийг шалгаруулах аж.