Дэлхий даяар улс орнуудад залуус буюу 20-50 насныхан зүрхний шигдээсийн улмаас гэнэт нас барах нь ихсэж байгаа талаар National Geоgraphic мэдээлжээ.

Залуусын дунд тохиолдох болсон зүрхний шигдээсийн түгээмэл шинж тэмдэг нь цээжээр өвдөх, тавгүйтэх. Мөн эрүү, хүзүү, гар, нуруугаар дамнан өвдөх, дутуу амьсгалах, ядарч сульдах зэрэг шинж тэмдэгтэй.

Судалгаагаар, 2000-2006 онд зүрхний шигдээсээр өвчилж АНУ-ын эмнэлэгүүдэд хандаж байсан 2000 залуусыг хамруулжээ. Үр дүнд нь зүрхний шигдээсээр өвчилсөн таван хүн тутмын нэг нь 40-өөс доош насны залуус байсныг тогтоожээ. Энэ нь энэ насныхны зүрхний шигдээсээр өвчлөх тохиолдол нь жил бүр 2 хувиар өсөж буйг харуулжээ.

Энэ судалгаа АНУ-ын Эрүүл мэндийн сэтгүүлд 2019 онд хэвлэгдэж байжээ. Тэгвэл энэ оны гуравдугаар сард хэвлэгдсэн өөр нэгэн судалгаанд 2020, 2021 онуудад залуус зүрхний шигдээсээр өвчилж, нас барах нь нэмэгдсэн болохыг өгүүлжээ.

ХЭН ЗҮРХНИЙ ШИГДЭЭСЭЭР ӨВЧЛӨХ ХАМГИЙН ӨНДӨР ЭРСДЭЛТЭЙ ВЭ?

Асуудал зөвхөн америкчуудад байгаа юм биш. Энэтхэг, Пакистан зэрэг орнуудад ч залуусын дунд зүрхний шигдээсээр өвчлөх нь нэмэгджээ.

Залуучуудын өвчлөл ихсэж байгаа, түүн дотроо залуу эмэгтэйчүүдийн доторх зүрхний шигдээсээр өвчлөх нь залуу эрчүүдээс илүү өндөр хувьтай байгаа ажээ.

2018 онд Сиркулэшн сэтгүүлд нийтлэгдсэн судалгаагаар, зүрхний шигдээсээр эмнэлэгт хандсан 35-54 насныхны тоо өмнөх жилүүдээс 5 хувиар өссөн байжээ. Харин залуу эмэгтэйчүүдийн хувьд өсөлт нь 10 хувь байгаа нь эрчүүдийнхээс хамаагүй илүү байгаа юм.

Энэ эмэгтэйчүүд чихрийн шижин, цусны даралт өндөртэй, бөөрний өвчтэй, өмнө харвалт өгч байсан зэрэг түүхтэй байв. Ер нь дараах шинж тэмдгүүд зүрхний шигдээсээр өвчлөх эрсдлийг илүү өндөр болгодог.

• Чихрийн шижин
• Цусны даралт өндөр байх
• Цусан дахь холестериний хэмжээ өндөр байх (цусан дах өөх тос)
• Таргалалт
• Тамхидалт

Дээрх өвчлөлүүд нь зүрхэнд хүчилтөрөгчөөр баялаг цус цутгах үйл ажиллагааг саатуулдаг гэжээ. Эдгээр нөхцлүүд нь удамшлын байж болох ч ихэнхдээ бага наснаасаа эхэлсэн буруу хооллолт, амьдралын буруу хэв маяг, эрүүл бус зуршилтай илүүтэй холбоотой байдаг гэж АНУ-ын Зүрхний өвчин судлал, урьдчилан сэргийлэх зөвлөлийн дарга Евгени Яанг хэлж байна.

Ковид ч мөн ихээхэн нөлөөлсөн. 2022 онд хэвлэгдсэн судалгаанд өгүүлснээр пандемикийн эхний жилд 25-44 насныхны зүрхний шигдээсийн улмаас нас баралт 14 хувиар өсчээ. Ковидын вирүс нь үрэвслийг нэмэгдүүлж, цусыг өтгөрүүлдэг нь зүрхний шигдээс болох нэг үндэс болдог байна.

Эх сурвалж: Nationalgeographic