“Дэлхий нийтээр ХДХВ/ДОХ-ын асуудалд анхаарал хандуулах өдөр”-ийг тэмдэглэн өнгөрүүлэх тухай санаачилгыг 34 жилийн өмнө Дэлхийн эрүүл мэндийн байгууллага гаргасан байдаг.

Жил бүрийн 12 дугаар сарын 1-ний өдрийг дэлхий улс орнууд ХДХВ/ДОХ-той тэмцэх үйл ажиллагааг эрчимжүүлэх, халдвараас урьдчилан сэргийлэх, хүн бүрийн оролцоог нэмэгдүүлэх зорилгоор нөлөөллийн ажлыг зохион байгуулдаг болсон юм.

Манай улсын хувьд ч жил бүр ХДХВ/ДОХ-ын асуудалд анхаарал хандуулах өдрийг төр, төрийн бус, иргэний нийгмийн байгууллагуудтай хамтран тэмдэглэн өнгөрүүлдэг.

Үндэсний статистикийн хорооноос мэдээлснээр улсын хэмжээнд 2022 оны аравдугаар сарын байдлаар ХДХВ/ДОХ-ын халдвартай нийт 341 хүн байна.

Өнгөрсөн гурван жилийн хугацаанд ХДХВ буюу ДОХ-ын тохиолдол хэрхэн бүртгэгдэж байсныг авч үзвэл:

• 2020 онд 25 тохиолдол бүртгэгдэж, нийт тохиолдол 311
• 2021 онд 16 тохиолдол бүртгэгдэж, нийт тохиолдол 327
• 2022 он гарснаар 14 тохиолдол бүртгэгдэж, одоогоор нийт 341 халдварын тохиолдолтой байна.

Ямар замаар дамжих вэ?

• Хамгаалалтгүй бэлгийн хавьтал- үрийн шингэн, үтрээний шүүрэл
• Халдвартай цус, цусан бүтээгдэхүүн, зүү тариур дамжуулан хэрэглэх
• Халдвартай эхээс хүүхдэд – төрөхөөс өмнө, төрөх үед, төрсний дараа хөхний сүүгээр

Халдварын хэлхээ

• Халдварын эх уурхай – ХДХВ/ДОХ-той хүн
• Өртөмхий байдал – бүх насны хүмүүс

ХДХВ-ийн халдварыг ямар тохиолдолд авахгүй вэ?

• ХДХВ-ийн халдвартай хүнтэй хамт хооллох, хувцас, аяга тавгаа дундаа хэрэглэх, тэврэх, үнсэх, гар барихад
• Жорлонгийн суултуураар, усан санд ороход, ханиах, найтаахад
• Халдвартай хүнтэй хамт амьдрах, ажиллахад халдвар дамжихгүй.

Xэрxэн урьдчилан сэргийлэх вэ?

• Бэлгийн харилцаанд орохдоо хамгаалалт хэрэглэх
• Халдвартай цус, цусан бүтээгдэхүүн хийлгэхгүй байх
• Зүү тариур, мэс заслын хэрэгсэл, хурц иртэй багаж xэрэгслийг дамжуулан xэрэглэхгүй байх
• Халдвартай эхээс урагт болон хөхний сүүгээр хүүхдэд тусах эрсдэлтэйг анхаарахыг зөвлөдөг.