“Сүрьеэ болон ям өвчний хяналт” төслийн хамтарсан зохицуулах хорооны хоёрдугаар хурал өнөөдөр боллоо.

Хуралд ЭМЯ-ны Нийтийн эрүүл мэндийн газрын дарга Д.Баярболд, Халдварт бус өвчний хэлтсийн дарга Г.Ганхуяг, Жайка-гийн Монгол дахь төлөөлөгчийн газрын дарга Танака Шиничи, Төслийн ахлах зөвлөх Такаши Кимура, Халдварт Өвчин Судлалын Үндэсний төвийн Сүрьеэгийн тандалт, судалгааны албаны зөвлөх Б.Буянхишиг, ХААИС болон бусад эмч, мэргэжилтнүүд оролцлоо.

Энэ үеэр ЭМЯ-ны Нийтийн эрүүл мэндийн газрын дарга Д.Баярболд “Төслийн хүрээнд сүрьеэ болон адууны ям өвчний эрсдэлийн үнэлгээг хийх аргачлалыг боловсруулж, ХӨСҮТ-ийн эрдмийн зөвлөлийн хурлаар хэлэлцүүлж, ЭМЯ-ны Анагаах ухааны ёс зүйн хорооноос зөвшөөрөл авч, үнэлгээг эхлүүлээг эхлүүлээд байна. Энэ хугацаанд малын ям болон сүрьеэгийн тандалтын шинжилгээнд Улаанбаатар хотоос сонгогдсон өрхүүдийг оруулаад байна.” гэдгийг онцоллоо.

Хурал танхим болон цахим хэлбэрээр зохион байгуулагдсан бөгөөд төслийн явц, анхаарах асуудлыг хэрэгжүүлэгч байгууллага бүрээр авч хэлэлцэх, хэрэгжүүлэлтийн талаар санал солилцлоо.