Шинэ жилийн баярын өдрүүдэд онцгой байдлын газар, цагдаагийн байгууллага, яаралтай түргэн тусламжийн төв зэрэг шуурхай албаны ачаалал нэмэгдэх хандлага жилээс жилд ажиглагддаг. Тэгвэл энэ жилийн баярын өдрүүдэд алба хаагчид өндөржүүлсэн байдалтай албаа гүйцэтгэх аж.

Онцгой байдлын газар жилээс жилд баярын өдрүүдэд өндөржүүлсэн бэлэн байдалтай ажилладаг. Энэ жил ч гэсэн тийм зохион байгуулалттай ажиллах гэнэ. Цагдаагийн байгууллагын тухайд өндөржүүлсэн бэлэн байдлын хоёрдугаар зэрэгт ажиллах бөгөөд гудамж талбайн эргүүл нэмэгдэж, 10 гаруй мянган алба хаагч улсын хэмжээнд баярын өдрүүдээр ажиллахаар болжээ.

Харин нийслэлийн түргэн тусламжийн төвийн алба хаагчид “24/48” хуваариар гурван ээлж тасралтгүй ажиллана. Нийслэлийн хэмжээнд нийт 42 эмнэлгийн баг ажиллах төлөвлөгөөтэй байгаагаас гадна ачаалал ихэсвэл нэмэлтээр 2-3 баг гарах гэж албаны хүн мэдээллээ. Мөн нэгдүгээр сарын 1-2-ны өдрүүдэд дүүргийн мэс засал, дотор, хүүхдийн тэргүүтэй тасгууд 10:00-15:00 цагийн хооронд, нийслэлийн Шүд, эрүү нүүрний төв эмнэлэг 09:00-15:00 цагийн хооронд, өрхийн эмнэлгүүд нэг эмч, нэг сувилагчтай 10:00-15:00 цагийн хооронд ажиллах хуваарь гарчээ.