Эрүүл мэндийн яамны ээлжит хэвлэлийн хурлын үеэр Нийслэлийн Эрүүл мэндийн газрын орлогч дарга Ж.Отгонболд мэдээлэл өглөө.

Тэрбээр "Жирэмсэн эмэгтэйчүүдийн 35 хувь нь коронавирусийн эсрэг дархлаажуулалтын хоёр тунд хамрагдсан байна. Ер нь дархлаажуулалтыг сайн дурын үндсэн дээр хийж байгааг хэлье.

Дархлаажуулалтын нэг тунд хамрагдаад халдвар авсан бол эдгэрээд хоёр сарын дотор зайлшгүй дараагийн тунд хамрагдах ёстой. Харин хоёр тунд хамрагдаад халдвар авсан бол эдгэрснээс хойш хамгийн багадаа гурван сарын дараа вакцины III тунд сайн дураараа хамрагдахыг зөвлөмөөр байна. Гэхдээ энэ тал дээр ч ямар нэг тушаал гараагүй байгаа.

50 хүртэлх хүнтэй байгууллага нь нийт ажилчдаа гурав дахь тунд хамруулахаар бол Нийслэлийн Эрүүл мэндийн газар болон Нэгдсэн Шуурхай штабт мэдээллээ өгвөл бид дархлаажуулалтын ажлыг шуурхай очиж зохион байгуулна.

Нас баралтын хувь тийм ч их нэмэгдээгүй. Нас баралтаас сэргийлэх гол зүйл нь тандалт шуурхай хариу арга хэмжээний баг цаг алдалгүй эмнэлэгт хүргэх асуудал л байгаа. Нэг иргэний амь нас үнэтэй. Бид цар тахалтай тэмцэхэд Монгол улс нэг иргэндээ 111 сая төгрөг зарцуулсан байна гэсэн эдийн засгийн тооцоолол гарсан" хэмээлээ.