Нийгмийн бодлогын байнгын хорооны хуралдаанаар Коронавируст халдвар /Ковид-19/-ын лабораторийн оношилгоо, эмчилгээ, дархлаажуулалтын талаар Эрүүл мэндийн сайд С.Энхболд мэдээлэл хийв.

Тэрбээр "Гэртээ эмчилгээ хийж байсан 55 хүн нас барсан. Ийм байдал үүсгэхгүйн төлөө ор зохицуулж, бүх чадлаараа ажиллаж байна. Хүүхдийн халдвар нийт тохиолдлын 20 хувийг эзэлж байсан. Сүүлийн долоо хоногт 18,7 хувь болж буурлаа. Долоо хоногт 7-8 мянган хүүхэд өвдөж байна. Бид цаашид ор нэмэх боломжгүй болсон. Хүний нөөц байхгүй. Тиймээс орны хязгаарлалт хийж байгаа. Орон нутагт 14 мянган хүн хэвтэн эмчлүүлж байгаагийн тал нь хөнгөн шинж тэмдэгтэй байна.

Манай улс шиг ард иргэддээ үнэгүй эм өгч байгаа улс ховор. Бид 70 мянган төгрөгийн эм өгч байсныг 160 мянга болгосон. Харамсалтай нь, цөөхөн хэдэн өрхийн эмнэлгийн удирдлагаас болж сошиалд буруу ойлголт түгэж, асуудал үүсгэсэн. Бид гэрийн хяналтыг сайн хийж байна гэж үзэж байгаа" гэв.