Жил бүрийн 11 сарын эхний долоо хоногийг “Антибиотик тэсвэржилтийн эсрэг” долоо хоног болгон ДЭМБ-аас зарласан байдаг.

Тэгвэл УНТЭ, Эрүүл мэндийн хөгжлийн зуун ассоциацаас санаачлан тус долоо хоногийг угтан “АНТИБИОТИКТ ТЭСВЭРЖСЭН НЯНГИЙН ХАЛДВАР”-аас сэргийлэх, хянах, эрүүл мэндийн байгууллагуудын үйл ажиллагааг эрчимжүүлэх, олон нийтэд эрүүл мэндийн боловсрол олгох улсын II аян"-ыг ирэх сарын 1-ний өдрөөс эхлэн 14 хоногийн хугацаанд зохион байгуулахаар төлөвлөөд байна.

Нянгийн тэсвэржилтийн асуудалд анхаарлаа хандуулж, олон нийтийн ойлголт, мэдлэгийг дээшлүүлэх, нянгийн эсрэг эмийн зохистой хэрэглээг дэмжих, нянгийн тэсвэржилтийн тархалтыг бууруулахын тулд салбар хоорондын хамтын ажиллагааг эрчимжүүлэх шаардлагатай байна. Уг аяны хүрээнд эрүүл мэнд, хүнс, хөдөө аж ахуйн салбарын ажилтнуудад зориулсан цахим сургалт явуулах, нянгийн эсрэг эмийн зохистой хэрэглээний талаар сурталчилгааны материалаар байгууллагуудыг хангах, иргэдийн эрүүл мэндийн боловсролд зориулж нянгийн эсрэг эмийн зохистой хэрэглээний талаар мэдээлэл, зөвлөмж зөвлөгөөг цахим хуудас, олон нийтийн мэдээллийн хэрэгслээр дамжуулан түгээх зэрэг ажлыг зохион байгуулах юм.

Та бүхнийг уг аянд нэгдэхийг уриалж байна.