Дэлхий дахинд шинэ технологи, баталгаатай лабораторийн тоног төхөөрөмж, урвалж оношлуурын үйлдвэрлэлээрээ тэргүүлэгч №1 Швейцарын ROCHE компани өнгөрсөн тавдугаар сард COVID-19-ийг богино хугацаанд оношлох боломжтой Elecsys Anti-SARS-COV-2 оношлуурыг үйлдвэрлэн гаргасан билээ.

Тэгвэл энэхүү оношлуурыг Roche компанийн Монгол дахь албан ёсны төлөөлөгч болох Сетунари ХХК нийгмийн хариуцлагынхаа хүрээнд тусгайлан захиалж, 400 хүний шинжилгээний урвалжийг өнөөдөр ХӨСҮТ-ийн лабораторид хандивлалаа. 

 Elecsys Anti-SARS-COV-2 шинэ оношлуур нь COVID-19-ийн вирусийн эсрэг биетийг богино хугацаанд эрт илрүүлэх 100% мэдрэг чанартай бөгөөд хүний бусад төрлийн короновирустэй харилцан үйлчлэлд ордоггүй тул хуурамч эерэг хариу гардаггүй гэдгээрээ PCR-аас бусад оношилгооны аргуудаас давуу талтай юм.

Мөн эмгэг төрүүлэгчийн эсрэг дархлаа үүссэн эсвэл үүсээгүй болохыг тодорхойлдог шинжилгээ бөгөөд хүн амын дундах вирусийн өртөлтийг илрүүлэх, тархалтыг үнэлэхэд ч ихээхэн шаардлагатай оношлуур болоод буй. 

Түүнчлэн Elecsys Anti-SARS-COV-2 оношлуур нь манай улсын хувийн болон улсын эмнэлгүүдийн лабораторид түгээмэл хэрэглэгддэг ROCHE компанийн Cobas e411 бүрэн автомат тоног төхөөрөмжийн тусламжтайгаар 9-18 минутад буюу богино хугацаанд вирусийг илрүүлэхээс гадна гар ажиллагаа шаардахгүйгээр шууд ашиглах боломжтой тул шинжилгээ хийж буй эмнэлгийн ажилчдыг халдварт өртөх эрсдлээс хамгаалах чухал ач холбогдолтой аж.