Шинэ төрлийн коронавирусийн халдвар илэрсэн франц иргэнтэй нэг онгоцонд ирсэн ДЭМБ-ын зөвлөх багийнхан  манай улсад ажиллаж байгаа билээ.

Тодруулбал, тэд ЭМЯ-ны ажлын хэсгийнхэнтэй хамтран  Сэлэнгэ, Дархан-Уул аймагт ажиллаж, коронавирусийн халдвараас урьдчилан сэргийлэх болон авч хэрэгжүүлж буй ажлуудтай биечлэн танилцсан юм.  Үүнээс гадна УИХ-ын дарга Г.Занданшатартай уулзаж, санал солилцсон байдаг. 
Тэгвэл ДЭМБ-ын зөвлөх багийнхныг өнөөдөр ХӨСҮТ-д тусгаарласныг Эрүүл мэндийн сайд Д.Сарангэрэл мэдээллээ. 

Тэрбээр “Мэдээлэл үнэн, Германы мэргэжилтнүүд холбогдох ёс журмын дагуу шинжилгээ өгч, ХӨСҮТ-д тусгаарлагдсан байгаа. Бид халдвар авсан франц хүний эрүүл мэндийн төлөө бүх чадлаараа ажиллана. Хятад, Өмнөд Солонгос, Япон, Иран, Итали таван улсаас ирсэн иргэдийг шууд тусгаарлан, шинжилгээ авч буй. Энэ таван оронд Франц улс багтаагүй, нөгөөтээгүүр тухайн иргэнд онгоцноос буух үед ямар нэг халдварын шинж тэмдэг илрээгүй тул зөвлөмж өгөөд явуулсан." гэв