"Австрали улсад очсон Монгол иргэнээс шинэ коронавирусийн халдвар илэрсэн" талаар Монгол Улсын Эрүүл мэндийн яам 13:48 цагт мэдээлсэн юм. Гэвч энэ мэдээлэл ташаа гэдгийг ЭМЯ-аас өнөөдөр 16:00 цагт дахин мэдээлэл хийж залрууллаа.

 Энэ талаар ЭМЯ-ны Төрийн захиргаа удирдлагын газрын дарга Б.Цогтбаатар  "Өнөөдрийн 14:40 цагийн байдлаар Австарлийн Эрүүл мэндийн газартай холбогдож мэдээллийг нягтлахад тухайн Монгол Улсын иргэн маань онгоцонд байсан халдвар авсан иргэнтэй хамт нисэж очсон бөгөөд Монгол Улсын иргэн шинэ коронавирусийн халдвар аваагүй байна" гэв.

Австрали улсад одоогийн байдлаар таван хүн коронавирусийн халдвараар өвчилсөн нь тогтоогдоод байгаа юм. Үүнээс дөрөв нь тус улсын иргэн байгаа бол нэг нь Австралид сурдаг 21 настай Хятадын оюутан гэж тус улсын хэвлэлүүдэд дурджээ.

Сануулахад, БНХАУ-ын Гуанжу хотоор дамжин Австралид очсон Монгол иргэн коронавирусын халдвар авсан тухай мэдээллийг албан эх сурвалж өгч байсан ч энэ нь дээрх мэдээллээр үгүйсгэгдлээ.