УИХ-ын эмэгтэй гишүүд "Хавдрын өвчлөлийн өнөөгийн нөхцөл байдал, цаашид хэрэгжүүлэх арга хэмжээний талаар" Монгол Улсын Ерөнхий сайдад асуулга тавьжээ. Асуулгын хариуг Ерөнхий сайд өнгөрсөн баасан гарагт хүргүүлсэн байна. 

Асуулгын хариу:

Монгол Улсад 2018 оны байдлаар 6073 хүн хавдраар шинээр оношлуулж, 4412 хүн хорт хавдрын улмаас нас баржээ. Нийт хорт хавдраар өвчлөгсдийн 77 хувь нь хожуу шатандаа оношлогдож, аймаг, дүүрэг, нарийн мэргэжлийн эмнэлэгт 19 мянга гаруй хүн хорт хавдрын хяналтад байна. Зонхилон тохиолдож буй хорт хавдрын: 
1. Элэгний хорт хавдар- 36.1 хувь
2. Ходоодны хорт хавдар- 14.8 хувь
3. Уушгины хорт хавдар- 8.5 хувь
4.  Улаан хоолойн хорт хавдар- 6.4 хувь
5. Умайн хүзүүний хорт хавдар 6.1 хувийг эзэлж байна. 

Хорт хавдрын өвчлөл, нас баралт нийгмийн хөгжил, хүний амьдралын хэв маяг, орчны бохирдол зэрэг хүчин зүйлээс шалтгаалан нэмэгдэх хандлагатай. Иймд улс орон бүр үндэсний түвшинд бодит байдлаа үнэлж, хүн хүч эдийн засгийн нөөцийг зохистой хуваарилан, хавдрыг эрт илрүүлэх, шаардлагатай эмийг хөнгөлөлттэй үнээр олгох, орчин үеийн эмчилгээ, оношлогоог өргөжүүлж чадвал хөрөнгө нөөц хязгаарлагдмал оронд ч илүү үр дүнд хүрч болно гэж ДЭМБ-аас томъёолжээ. 

Засгийн газраас хавдрыг эрт илрүүлэх зорилгоор хүн амын нас хүйс, эрүүл мэндийн эрсдэлд нийцүүлэн эрт илрүүлэг үзлэгийн багцыг баталжээ. Энэхүү багцын хүрээнд 30 наснаас эхлэн нас, хүйсийн онцлогоос хамаарч, элэг, бүдүүн шулуун гэдэс, ходоод, хөх, умайн хүзүү, түрүү булчирхайн хавдрын эрт илрүүлэгт Эрүүл мэндийн даатгалын санхүүжилтээр үнэ төлбөргүй хамрагдах боломж бүрдсэн. Энэ үйл ажиллагаа хэрэгжиж эхэлснээс хойших хоёр сарын хугацаанд 52 мянга гаруй иргэн үзлэг, шинжилгээнд хамрагджээ. 

Үзлэгт хамрагдсан иргэдээс 35.1 мянга буюу 67 хувь нь эмэгтэйчүүд байгаа бол 46-64 насны эмэгтэйчүүд хамрагдалт хамгийн өндөр буюу 29 хувьтай байсан тухай асуулгын хариуд дурджээ. 

Ерөнхий сайдын илгээсэн асуулгын хариуг бүрэн эхээр нь үзэх бол ЭНД дарна уу.