Энэ долоо хоногт ЭРҮҮЛ МЭНДИЙН САЛБАРТ болсон үйл явдлыг тоймлон хүргэж байна.

 

Эрүүл мэндийн сайд А.Цогцэцэг “Эмэгтэйчүүдийн манлайллын хөтөлбөр”-ийн арга хэмжээнд оролцов

Австрали Улсын Засгийн газрын санаачлагаар Монгол Улсад хэрэгжиж буй “Эмэгтэйчүүдийн манлайлал хөтөлбөр” -ийн төслийн арга хэмжээ 2 дугаар сарын 9-ний өдөр боллоо.

Энэхүү арга хэмжээг нээж Эрүүл мэндийн сайд А.Цогцэцэг, Австрали Улсаас Монгол Улсад суугаа Элчин сайд ноён Жон Лангтри нар үг хэллээ.

Сайд А.Цогцэцэг хөгжлийн бэрхшээлтэй хүүхдүүдэд тэргэнцэр хандивлах энэхүү үйл ажиллагаа нь эдгээр хүүхдүүдэд болон тэдний эцэг эхчүүдэд сэтгэлийн дэм, урам зориг өгсөн сайхан үйл болохыг онцлон хэлээд, энэхүү үйл ажиллагааг дэмжиж байгаагаа мэдэгдэн өөрийн зүгээс нэг сарын цалингаа хандивлалаа.

"Эмэгтэйчүүдийн манлайлал хөтөлбөр" нь нийгэмд эерэг өөрчлөлт авчрах зөв зүйтэй санал санаачилга, төслүүдийг дэмжин ажилладаг бөгөөд энэ удаагийн арга хэмжээ нь хөгжлийн бэрхшээлтэй хүүхдүүдэд зориулан Австрали улсаас 332 тэргэнцэр тээвэрлэн авчирч, Сонгинохайрхан дүүргийн өрх толгойлсон эцэг, эхтэй, амьдралын боломж тааруу болон тусгай сургуулиудын 60 хүүхдэд одоо байгаа тэргэнцрийг биед нь зохих шаардлагын дагуу тааруулж, 3 сарын витамины хэрэгцээг нь хангаж, эмчийн үзлэг, оношилгоонд хамруулах үйл ажиллагааг дэмжих явдал байв.

ХДХВ,ДОХ-ын төсөл 2021 он хүртэл үргэлжилнэ

Манай улс ДОХ,Сүрьеэ, Хумхаа өвчитэй тэмцэх Глобаль сангаас 2003 оноос хойш ДОХ, Сүрьеэ, эрүүл мэндийн тогтолцоох бэхжүүлэх чиглэлээр 57.9 сая долларын төсөл хэрэгжүүлсэнээс 21,5 сая долларыг ХДХВ,ДОХ-оос сэргийлэх үндэсний арга хэмжээнд зарцуулсан байна. Глобал сангийн буцалтгүй тусламж хэлбэрээр олгогддог энэхүү санхүүжилт нь манай улсын хувьд олон улсын хэмжээнд дэвшүүлсэн зорилтоо биелүүлэх, Үндэсний хэмжээний бодлого, төлөвлөгөөний хэрэгжилтийг хангахад чухал үүрэг гүйцэтгэсээр ирсэн юм. Өнөөдөр Глобаль сангийн дэмжлэгтэй ХДХВ,ДОХ-ын үргэлжилэх шатны төсөл боловсруулах, Халдварт өвчинөөс сэргийлэх, хянах үндэсний хөтөлбөр /2017-2021/ хэлэлцэх хамтрагч талуудын зөвлөлдөх уулзалт боллоо. Энэ арга хэмжээнд Эрүүл мэндийн Дэд сайд Л.Бямбасүрэн оролцож үг хэллээ.

Тэрээр үндэсний хэмжээнд авч хэрэгжүүлж буй арга хэмээнд зарцуулж нийт хөрөнгийн 70 хувийг Глобаль сангийн сангийн санхүүжилт эзэлдэг. Санхүүжилтийн хүрээнд ХДХВ-ийн халдвараас сэргийлэхэд чиглэсэн арга хэмжээг эрүүл мэндийн болон бусад салбар, иргэний нийгмийн байгууллагуудын оролцоотойгоор цогц байдлаар хэрэгжүүлсэнээр нийт хүн амын дундах ХДХВ-ийн халдварын тархалтыг бага түвшинд тогтоож барьж чадсан гэж үзэж байгаагаа онцолсон юм.

Энэтхэг улстай эрүүл мэндийн салбарт хамтран ажиллана

Эрүүл мэндийн дэд сайд Л.Бямбасүрэн тэргүүтэй төлөөлөгчид Бүгд Найрамдах Энэтхэг Улсад энэ сарын 3-наас 7-ны өдрүүдэд ажлын айлчилал хийлээ. Энэ үеэр Дэд сайд Л.Бямбасүрэн Шинэ Дели хотноо Энэтхэг улсын Эрүүл мэнд, гэр бүл, халамжийн яам, Худалдаа, аж үйлдвэрийн танхим хамтран зохион байгуулсан Эрүүл мэндийн технологийн үзэсгэлэнгийн нээлтэд оролцсон юм. Тус үзэсгэлэнд Энэтхэг улсын 100 гаруй техник технологийн компани бүтээгдэхүүнээ танилцуулсан ба уг үзэсгэлэнгийн түншээр Япон улсын Засгийн газрыг төлөөлж Энэтхэг улс дахь Япон улсын Элчин сайдын яам оролцож, тус улсын томоохон компаниуд бүтээгдэхүүний дээжээс танилцуулжээ.

Дорнод аймгийн өвөлжилт хүндэрсэн, зудын гамшгийн нөхцөлд өвөлжиж буй зорилтот бүлгийн иргэдэд төрөлжсөн мэргэжлийн эмч нарын тусламж үйлчилгээг үзүүлэх, болзошгүй эрсдэлээс урьдчилан сэргийлэх, соён гэгээрүүлэх ажлыг зохион байгуулах зорилгоор аймгийн Засаг даргын захирамж  гарсан байна. Үүнтэй холбогдуулан Эрүүл мэндийн газар, ХХҮХ, ЭМНДХ-ийн мэргэжилтнүүд болон Бүсийн оношилгоо эмчилгээний төвийн төрөлжсөн мэргэжлийн эмч нар /дотор, шүд, эмэгтэйчүүд, хүүхэд/-ын баг хөдөөгийн 13 сумын төв, сумын төвөөс алслагдсан айл өрх мөн аймгийн төвийн алслагдсан иргэдэд хүрч үйлчлэхээр 1 дүгээр сарын 29-ний өдрөөс ажиллаж эхлээд байна.

ЭМЯ, Азийн хөгжлийн банктай хамтран “Улсын эмнэлгүүдийн боломжийн үнэтэй эмийн хангамж, хүртээмжийг сайжруулах, зохицуулалтын үйл ажиллагааг бэхжүүлэх” төслийг хэрэгжүүлэх талаар уулзалт хэлэлцүүлгийг зохион байгууллаа. Уг уулзалтанд ЭМЯ, АХБ-ны төслийн баг, ЭМХТ, МХЕГ, ЭМНДЕГ-ын ЭМДГ, АШУҮИС, төв эмнэлэг, тусгай мэргэжлийн төв, аймаг, нийслэлийн эрүүл мэндийн газар, хувийн хэвшлийн эмнэлгийн төлөөлөл бүхий 35 хүн оролцлоо. Уулзалтыг нээж Төрийн нарийн бичгийн дарга Д.Очирбат үг хэллээ. Тэрээр Эмийн зохистой хэрэглээг сайжруулах, өвчтний эм худалдан авах боломжийг нэмэгдүүлэхийн тулд олон улсын шилдэг дадалд үндэслэн эмийн сангийн үйлчилгээг өргөжүүлж, амбулаторийн өвчтөнд үзүүлэх эм зүйн тусламжийг нэмэгдүүлэхээр зорьж байна.

Хүн ам, тэр дундаа бага насны хүүхдийн амь нас, эрүүл мэнд, амьдралын чанар улмаар улс орны нийгэм эдийн засгийн өмнө тулгамдаад байгаа асуудалд бага насны хүүхдийг түлэгдэлтийн аюулаас урьдчилан сэргийлэх, түлэгдлийн шалтгаан, нөхцөл хор уршгийг танин мэдүүлэх, асран хүмүүжүүлэгчдийн үүрэг хариуцлагыг нэмэгдүүлэх шаардлагатай байна. ЭМЯ, ГБХЗХГ , НБГ,  НЭМҮТ, ГССҮТ ,НOБГ хамтран Осол гэмтэлээс сэргийлэх “Хүүхдийн түлэгдэл-эцэг эхийн хариуцлага сэдэвт сургалтыг Нийслэлийн  харьяа  цэцэрлэгүүдийн  эрхлэгч, сургалтын арга зүйч  нарт зориулан явуулж байна. Энэхүү сургалтаар үр дүнд Хүн амын дунд бага насны хүүхдийн түлэгдлээс урьдчилан сэргийлэх мэдлэг, хандлага дээшилэх , Багш, эцэг, эх асран хамгаалагчдын түлэгдлийн үед үзүүлэх анхны тусламжийн чадвар сайжирна гэж үзэж байна. Сургалтын нээлтэнд ЭМЯ-ны Төрийн нарийн бичгийн Дарга Д.Очирбат оролцож үг хэллээ. Тэрээр дэлхий дахинд осол гэмтлээс шалтгаалсан нас баралтыг эндэх ёсгүй эндэгдэл буюу урьдчилан сэргийлэх бүрэн боломжтой эндэгдэл хэмээн үзэж осол гэмтэл тэр дундаа түлэгдэл нь хүний амь нас, эрүүл мэнд, амьдралын чанарт үзүүлж буй хор хохирол нь эрсдэлтэй, аюултай гэмтлийн нэг юм. Ялангуяа бага насны хүүхэд нь аюултай нөхцлийг бүрэн гүйцэд ухамсарлах чадвар хязгаарлагдмал, эсрэг хариу урвалыг гүйцэд хурдан үзүүлж чаддаггүйгээс аливаа нэгэн аюулд илүүтэй өртөж нас барах, хөгжлийн бэрхшээлтэй болох нь жилээс жилд нэмэгдэж байна.Тиймээс томчууд бид хараа хяналтаа сайжруулах нь чухал гэдгийг онцоллоо.

Эрүүл мэндийн сайдын тушаалын дагуу сар бүрийн 3-ны өдрийг ЦССҮТ-өөс “Цусаа бэлэглэх өдөр” болгон зарласан билээ. Уламжлал болсон уг арга хэмжээ 2017 оны 02 дугаар сарын 03-нд ЦССҮТ-ийн шинэ байранд боллоо. 2 дугаар сард Монголын уламжлалт цагаан сарын баяр тохиодог учир ЦССҮТ-өөс цусаа бэлэглэх аянг “Сэтгэлийн 1000 донор” уриан дор 2 дугаар сарын турш үргэлжлүүлэх болсноо энэ үеэр зарлалаа. Цаг үеийн онцлогоос шалтгаалан өнгөрсөн жил ч ийм аян зохиосон бөгөөд “Сэтгэлийн 1000 үйлс” хэмээх нийгэмд үйлчлэх ТББ хоёрдахь жилдээ хамтран тэмдэглэж байгаа юм. Мөн Д. Гүрсэд захиралтай “Прайд трейдинг” ХХК, Монголын үндэсний сагсан бөмбөгийн холбоо (МҮСБХ) дэмжиж оролцохоо илэрхийллээ. Энэхүү сарын аяны хүрээнд МҮСБХ-ны “Sprite league”-ийн тамирчид цусаа бэлэглэх аж.

Монгол Улсын Ерөнхий сайдын ивээл дор “Ахмад настны эрх, хөдөлмөр эрхлэлт, нийгмийн хамгааллын баталгаа” үндэсний чуулган Төрийн ордонд болж байна. Хөдөлмөр, нийгмийн хамгааллын яам, Монголын ахмадын холбоо хамтран зохион байгуулж буй энэ арга хэмжээнд Монгол Улсын 270 мянга гаруй ахмадын төлөөлөл болсон 500 ахмад оролцож байна. Энэ үеэр эрүүл мэндийн дэд Сайд Л.Бямбасүрэн "Ахмад настны эрүүл мэндийн талаар төрөөс баримтлах бодлого, хэрэгжүүлж буй арга хэмжээний талаар илтгэл тавилаа. Илтгэлийг бүрэн эхээр нь хүргээ байна. Өнөөдөр хэлэлцэж байгаа асуудлын гол тулгуур, суурь нь ахмад настны эрүүл мэндийн асуудал юм. Өнөөдөр хүн бүр эрүүл байж л дараа нь хөдөлмөр эрхлэлт, эрх, нийгмийн хамгааллын баталгаа яригдана. Монгол хүний дундаж наслалт 2015 оны эрүүл мэндийн үзүүлэлтээр 69.89 хүрч, энэ үзүүлэлт 10 жилийн өмнөх үеэс 5-6 насаар өссөн байна. Гэхдээ эмэгтэйчүүдийн дундаж наслалт 75,8 эрэгтэйчүүдийнх 66,02 байгаа буюу эмэгтэйчүүд эрэгтэйчүүдээс дунджаар 9 жилээр урт насалж байна. Хүн амын насжилт нэмэгдэхэд тэдний эрүүл мэнд, нийгмийн хамгааллыг сайжруулах, орлогын баталгаат байдлыг хангах, ээлтэй амьдрах орчин бүрдүүлэх зэрэг шийдвэрлэх шаардлагатай олон асуудлууд шинээр урган гарч байна" гэлээ.

Бид аймаг, нийслэлийн ахмадын хороо, дүүргүүдийн ахмадын хороо, Монголын ахмадын холбоо, Улаанбаатар Төмөр зам ахмадын холбоо, Зуунтай ахмадын холбоо зэрэг олон төрийн бус байгууллагуудтай хамтран эрүүл, идэвхтэй урт наслах, настанд зонхилон тохиолдох халдварт болон халдварт бус өвчнөөс урьдчилан сэргийлэх, эрүүл мэндийн боловсрол олгох ажлыг зохион байгуулж, 13 төрлийн, 37 удаагийн сургалт, сурталчилгааны ажилд нийт 2645 настанг хамрууллаа.