Өнгөрсөн оны наймдугаар сард Моносын эмийн санчийн хариуцлагагүй үйлдлээс болж 16 нярай  сэтгэцэд нөлөөлөх хүчтэй эмэнд хордож, ЭХЭМҮТ-д хэвтэн эмчлүүлж байсан билээ.
Тухайн үед хордсон 16 нярай үе үе өвдөж эмнэлэг барааддаг болсон гэнэ.

Өдгөө ой гарантай нэг хүүхэд нь ЭХЭМҮТ-ийн сэхээн амьдруулах тасагт хэвтэж байгаа аж. Тодруулбал тухайн үед эм ууж хордсон нярайн хамгийн бага нь тав хоногтой О байсан бөгөөд энэ явдлаас хойш түүний бие байнга  өвдөж,  ЭХЭМҮТ-д эмчлүүлдэг болсон байна. Харин хэвтэх бүрдээ сэхээний тасагт эмчлүүлдэг юм байна.Одоо ч гэсэн сэхээнд хэвтэн эмчлүүлж байгаа гэж охины аав ярилаа. 

Тухайн үед ЭХЭМҮТ-ийн хүүхдийн эмчийн бичиж өгсөн сэтгэцэд нөлөөтэй  “Люминал” эмийг “Монос-Эх нялхас” эмийн сангийн ажилтан алдаа гарган, том хүний тунгаар тав хоногтойгоос гурван сартай хүртэлх насны дээрх хүүхдүүдэд өгсөн байдаг.

5-10 мг-аар уух ёстой тус эмийг 200 мг-аар уусан хүүхдүүдэд эмийн хордлогын эсрэг эмчилгээ, ходоодны угаалга хийсэн ч хоёр хүүхдийн байдал “хүнд” гэсэн оноштойгоор жил гаруй хугацааг өнгөрүүлээд байна.