Монгол улсын нэг сая дахь иргэн 1962 онд, хоёр сая дахь иргэн 1988 онд, гурван сая дахь иргэн 2015 оны 01-р сарын сарын 24-нд эцэг Э.Хатанболд, эх Г.Аззаяа нарын гэр бүлд мэндэлсэн охин тодорчээ. Гурван сая дахь иргэний мэдээллийг ажлын хэсгээс Монгол улсын Ерөнхийлөгчид өнөөдөр/2015.01.28/ хүргэлээ.

Ажлын хэсгийн дарга, Монгол Улсын Ерөнхийлөгчийн Тамгын газрын дарга П.Цагаан хэлэхдээ, “Шинэхэн цас бударсан энэ өглөө Монгол улсын 3 сая дахь иргэн төрсөн талаархи мэдээллийг дуулгахдаа таатай байна” гэсэн бөгөөд Үндэсний статистикийн хорооны дарга С.Мэндсайхан гурван сая дахь иргэний мэдээллийг танилцуулсан юм.

Тэрээр хэлэхдээ, “Журмын дагуу гурван сая дахь иргэнийг тодруулсан. Статистик төрөлтийн мэдээг эрүүл мэндийн газраар дамжуулан авч, комисс өдөрт 2 удаа, 12 цагийн давтамжтайгаар авсан. Гадаадад төрсөн хүүхдийн мэдээллийг консулын газраар дамжуулан авсан байгаа. Ийнхүү нэгтгэн дүгнэсний дүнд 2015 оны 01-р сарын сарын 24-ний өдөр эцэг Энхтүвшингийн Хатанболд, эх Ганбатын Аззаяа нарын охин Монгол Улсын гурван сая дахь иргэн болсон. Тухайн өдөр 181 иргэн төрсөн бөгөөд үүнээс 3 нь гадаадад төрсөн. Яг гурван сая дахь иргэн гэдгийг өчигдөр орой тодорхойлсон. Ажлын хэсэг болон төрийн байгууллагууд онцгойлон сайн ажиллалаа. Монгол Улсын гурван сая дахь иргэн тухайн өдрийн 23 дахь төрөлт бөгөөд тэрбээр өглөөний 08:27 цагт төрсөн байна” гэлээ.

Эрүүл мэнд, спортын сайд Г.Шийлэгдамба хэлэхдээ “ Эх хүүхэд эмчийн хяналтад байгаа. Гурван сая дахь иргэн эхийнхээ анхны хүүхэд, 3.5 кг 50см өндөр. Эх хүүхдийн биеийн байдал сайн байгаа” гэв.