Япон улсын Эрүүл мэнд, нийгмийн хамгаалал, хөдөлмөрийн яамны Эмнэлгийн яаралтай тусламжийн газрын орлогч дарга, профессор Хироши Нагучи тэргүүтэй төлөөлөгчид Монгол улсад ажиллаж байна. Энэ хүрээнд Эрүүл мэндийн яамны Бодлогын хэрэгжилтийг зохицуулах газрын дарга Я.Буянжаргал төлөөлөгчдийг хүлээн авч уулзаж, Монгол улсын эмнэлгийн яаралтай тусламжийн тогтолцоо тэр дундаа түргэн тусламжийн үйлчилгээний хүртээмжийг сайжруулах, хүний нөөцийг чадавхижуулах талаар санал солилцжээ. Мөн уулзалтад ЭМЯ-ны Эмнэлгийн тусламжийн хэлтсийн Яаралтай ба түргэн тусламжийн бодлогын хэрэгжилтийн зохицуулалт хариуцсан мэргэжилтэн Ч.Баярмаа оролцов. Ноён Хироши Нагучи тэргүүтэй төлөөлөгчид Улсын нэгдүгээр төв эмнэлэг, Улсын гуравдугаар төв эмнэлэг, Нийслэлийн яаралтай түргэн тусламжийн төвийн үйл ажиллагаатай танилцахын зэрэгцээ өнөөдөр “Нийслэлийн иргэдэд үзүүлэх түргэн тусламжийн үйлчилгээг чадавхжуулахад Япон улсын туршлагыг нэвтрүүлэх нь” сэдэвт хамтарсан уулзалтад оролцох аж.