2014 оны 10 дугаар сарын 31-ний өдрийн 10.00 цагийн байдлаар: 

Монгол улсад:  

Улаанхус сумын 52 хүүхдэд хоолны хордлогын шинж тэмдэг илэрчээ

Баян-Өлгий аймгийн Улаанхус сумын цэцэрлэгийн 52 хүүхэд хоолны хордлогоор өвчилсөн бөгөөд эдгээрээс 3 хүүхдийн биеийн байдал хүндэвтэр байна. Хүүхдүүдэд халуурах, бөөлжих, гүйлгэх зэрэг эмнэлзүйн шинж тэмдэг илэрсэн. Аймгийн Мэргэжлийн хяналтын газраас  хүнсний бүтээгдэхүүний 45 сорьц, гадаад орчны 55 сорьц цуглуулан шинжилж байна.

 Эх сурвалж: ХӨСҮТ, МХЕГ 

Томуу, томуу төст өвчин нэмэгдсэн үзүүлэлттэй байна

2014 оны 10 дугаар сарын 20-ноос 26-ны өдрийг хүртэлх хугацаанд улсын хэмжээнд нийт 174.499 хүн амбулаториор үйлчлүүлсний 9.875(5.7%) нь томуу, томуу төст өвчинтэй гэж оношлогдсон. Энэ нь өмнөх 7 хоногоос 0.1 хувиар бага, өнгөрсөн оны мөн үеэс 0.6 хувиар их байгаа юм. Мөн 10.000 хүн амд 36.5 тохиолдол бүртгэгдсэн нь өмнөх 7 хоногоос 2.7, өмнөх оны мөн үеэс 4.0 тохиолдлоор нэмэгдсэн үзүүлэлттэй байна. Улсын хэмжээнд томуу, томуу төст өвчний тохиолдлын тоо нэмэгдсэн байна.

Иймд иргэдэд томуу, томуу төст өвчнөөс сэргийлэх зорилгоор дараах сэрэмжлүүлгийг хүргүүлж байна. Үүнд:

• Хүйтэн, сэрүүний улирал эхэлж байгаатай холбоотойгоор хувцсаа тохируулан өмсөх, даарч, хөрөхгүй байх,

• Гэр, сургууль, цэцэрлэг, ажлын байрны өрөө тасалгаанд цаг тутамд 10-15 минут цэвэр агаар оруулж, өдөрт 2-оос доошгүй удаа чийгтэй цэвэрлэгээ хийх,

• Илчлэг сайтай, амин дэмээр баялаг хоол хүнс, жимс, жимсгэний шүүс хэрэглэх,

• Гараа тогтмол савандаж угаах,

• Хүүхдийг цэвэр агаарт салхилуулах, хамрын хөндийг байнга цэвэрлэж байх,

• Үзвэр, үйлчилгээ, олон нийтийн газраар сэлгүүцэхгүй байх,

• Ханиах, найтаах үедээ ам, хамраа нусны алчуур, сальфеткаар таглах, цэр нус, шүлсээ ил задгай хаяхгүй байх, амны хаалт зүүх,

• Томуугийн эсрэг вакциныг ХӨСҮТ-ийн сайн дурын дархлаажуулалтын кабинет (101 тоот өрөө), 21 аймгийн Эрүүл мэндийн газрын дархлаажуулалтын кабинетэд хандан тариулах,

 • Томуу, томуу төст өвчний шинж тэмдэг илэрвэл гэртээ өөрийгөө тусгаарлах зэрэг арга хэмжээ авахыг зөвлөж байна.

 Эх сурвалж: ХӨСҮТ

Говьсүмбэр аймагт галзуу өвчин гарлаа 

Говьсүмбэр аймгийн Сүмбэр суманд малын галзуу өвчин бүртгэгдэж, 10 дугаар сарын 30-ны өдрөөс эхлэн хөл хорионы дэглэм тогтоосон байна.

 Эх сурвалж: ОБЕГ 

Дэлхий дахинд: 

Эбола вируст халдвар, дэлхий дахинд: 

2014 оны 10 дугаар сарын 27-ны өдрийн байдлаар дэлхийн 9 улсад 13769 тохиолдол бүртгэгдэж, 4969 хүн нас барсан байна.

Эбола вируст халдвар, бодит тоогоор,эрчимттэй тархалттай бүс нутгаар