Дээрхийн гэгээнтэн XIY Далай лам өнгөрсөн сарын 28-нд  монголчуудад зориулан онлайнаар ном айлдсан билээ.

 “Монгол Сүнчой-2019” хэмээх онлайн номын айлдварыг анх Буянт-Ухаагийн спорт цогцолборт зохион байгуулах товтой байв. Арга хэмжээг зохион байгуулж буй Монголын бурхан шашны төв Гандантэгчинлэн хийд болон “Ламын гэгээн монгол сүнчой” төрийн бус байгууллагаас энэ тухай зар сурталчилгааг хангалттай явуулсан. Гэвч гэнэт байрлал өөрчлөгдөж, Бөхийн өргөөнд уг арга хэмжээ болсон юм. Үүнийгээ “техникийн шалтгаанаас…”гэж тайлбарласан. Гэтэл бодит байдал дээр  “улс төрийн шалтгаантай” байжээ. Тодруулбал, зохион байгуулагчдын явуулсан зар болон авсан мэдээллийнхээ хүрээнд Улаанбаатар дахь БНХАУ-ын Элчин сайдын яамнаас Монгол Улсын Шадар сайд Ц.Энхтүвшинтэй уулзсан байна.

Уулзалтаар, БНХАУ-ын Засгийн газрын буцалтгүй тусламжаар барьж байгуулж өгсөн Буянт-Ухаа цогцолборт тус улстай сөргөлдөгч Далай ламын онлайн ярилцлагыг шууд дамжуулж, зохион байгуулж буйд Бээжин дургүйцлээ илэрхийлснийг уламжилжээ.

Мөн 2016 онд Далай лам Улаанбаатарт айлчилсны дараа БНХАУ, Монгол Улсын дипломат харилцаанд үл ойлголцол гарч, эдийн засагт, Монгол Улсын экспортын гол түүхий эд болох нүүрсний тээвэрлэлт сааралт гарсныг сануулжээ.   Эх сурвалжийн мэдээлснээр, Монгол Улс нь “алдаа”-гаа давтвал хоёр орны харилцаа Далай ламын 2016 онд Монголд айлчилсны дараах шиг дахин хүйтрэх хөндийрөх болно гэдгийг дипломат маягаар сануулсан бололтой юм.

Иймд Шадар сайдын уулзалтын дараа Далай ламын онлайн айлдвар болох газар өөрчлөгдөж Буян-Ухаагаас Бөхийн өргөөнд шилжжээ.

Дашрамд дурдахад, энэ зун Улаанбаатарт болох Дэлхийн энх тайвны буддистуудын хуралд Далай лам, түүний төлөөлөгчдийг оролцуулахгүй байх, тэдэнд Монгол Улсад зорчих виз олгохгүй байх талаар БНХАУ-ын Элчин сайдын яамнаас манай улсын талд удаа дараа мэдэгдэж байгаа юм.