Оюун ухааны ихэр тамирчин Н.Мөнхшүр, Н.Энхшүр нар Бээжингийн их сургуулийг төгсөж, магистрын зэргээ амжилттай хамгаалжээ.

Тэд 2016 онд ой тогтоолтын спортоор өсвөрийн дэлхийн аварга болж, олон улсын их мастер цол хүртэж байв. Мөн 2017 онд Н.Мөнхшүр багц хөзөр цээжлэх төрөлд 1 цагт 1924 хөзөр, Н.Энхшүр 30 минутад 5445 цифр цээжилж, Гиннесийн дээд амжилтыг шинээр тогтоосон юм.

Энэ талаар цахим хуудаснаа, “Ингээд магистрын зэргээ амжилттай хамгаалаад сургуулиа төгсөж байна. Гадаад оюутнууд дунд дипломаа хамгийн сайн бичсэн гэдэг өндөр үнэлгээг профессор багш нараасаа авлаа. Судалгааны ажилд маань дэмжиж тусалсан хүмүүстээ, мөн бүхий л үед дэмжиж байдаг гэр бүл, ах дүү, найз нөхдөдөө маш их баярлалаа. Сурч мэдсэн зүйлээ хэрэгжүүлэх амьдралын маань нэгэн шинэ хуудас эхэлж байна” хэмээжээ.