Тун удахгүй есдүгээр сарын 1 болж, шинэ хичээлийн жил эхлэх гэж байна. Сургуулийн босго анх алхан орж буй зургаан настнуудын ээж, аавууд энэ өдөрт хамаг чадлаараа бэлтгэж, бас санаа зовниж суугаа.

Эдгээр зөвлөгөө үр хүүхдийг тань хичээлийн анхны өдөртөө бэлэн байхад тус болно гэж найдаж байна.

Зөвлөгөө №1: Өөрсдийгөө бэлд

Хамгийн эхний бөгөөд хамгийн чухал зүйл бол эцэг, эхчүүд хувьдаа бэлтгэлтэй байх ёстой. Нэгдүгээр ангийн хүүхэдтэй эцэг, эхчүүд хүүхдээ сургуульд бэлтгэх нарийн төлөвлөгөө гаргахгүй бол үр дүнд хүрэхгүй. Хүүхэд бүр өөрийн гэсэн хувь хүн гэдгийг ойлгох нь чухал. Хамгийн гол нь хүүхдийн авсан дүн биш, түүний мэдлэг олж авах хүсэл сонирхол, таашаал нь чухал гэдгийг санаарай. Үүнээс гадна хүүхэд тань сурахад танаас цаг, хүч зарцуулах нэн ярвигтай ажил үүснэ гэдгийг ч ухамсарлаарай.

Зөвлөгөө №2: Хүүхэд тань сэтгэл санааны хувьд бэлэн байх хэрэгтэй

Сургууль бол зургаан настнууд болон тэдний эцэг эхчүүдэд томоохон стресс үүсгэгч. Хүүхэд нэгдүгээр ангид орохдоо л нас бие гүйцсэн хамт олон дунд нэгдэж, том болсон гэдгээ ухамсарлах ёстой. Бас тодорхой үүрэг даалгавар бүхий бие даасан бяцхан хэсэг гэдгээ ойлгох нь чухал. Хүүхдийнхээ үеийнхэнтэйгээ харьцах хэрэгцээ, хүсэлтийг нь биелүүлж, сургууль дээр цагийг таатай өнгөрөөх тав тухтай, тохилог орчин болоход нь дэмжлэг үзүүлээрэй.

Зөвлөгөө №3: Унших, бичих, тоолох, бүтээх энгийн дадалд сурга.

Хүүхэд тань сургуульд орохоосоо өмнө сургалтын энгийн дадал зуршил эзэмшсэн байх ёстой. Хүүхдэдээ ном уншиж өг. Үүнээс гадна хүүхэд тоглоомоо тоолж, хөгжүүлэх тоглоом тоглож, үеэр бичиж сурсан байх ёстой. Мөн хүүхэдтэйгээ нийлж зураг зурж, цаас хайчилж тоглоорой. Хичээлийг өглөөний цайнаас хойш 15 минутын хугацаанд хийвэл зүгээр. Ингэснээр хүүхэд хичээлийн дэглэмд дасна. Энэ үеэр хүүхдээ буруу зүйл хийвэл бүү уурла. Таны даалгавар бол туслах, тайлбарлах, хөгжилтэй, сонирхолтой байдлаар үзүүлэх юм.

Зөвлөгөө №4: Биеийн хөгжилд нь анхаар

Хүүхдэдээ өглөөний дасгал хийхэд зориулж, нэг булан гаргаарай. Өглөөний дасгал хийснээр хүүхдийн нойр нь сэргэж, ядаргаа нь тайлагдаж, биеэ дааж үүрэг даалгавраа гүйцэтгэх чадвартай болно. Эмч нар зөвлөж буйгаар эцэг эхчүүд сургуулийн насны хүүхэдтэйгээ хамт өглөөний цайнаас өмнө дасгал хийвэл илүү үр дүнтэй гэнэ.

Зөвлөгөө №5: Хичээлээ хийх байр гаргаж өг

Хүүхдэдээ хичээлээ хийх ширээ, дэвтэр, харандаа, үзгээ хадгалах сав бүхий тусгай булан гаргаж өгөх хэрэгтэй. Хүүхдэдээ энэ нь ямар зориулалттай гэдгийг тайлбарлаж, бүхнийг эмх цэгцтэй хураахад нь туслаарай. Хүүхэд ширээнийхээ ард том хүн болсон гэдгээ мэдэрч байх ёстой. Энэ нь сургуульдаа бэлтгэхэд эергээр нөлөөлөх болно.

Зөвлөгөө №6: Сургуультай нь танилцуул

Хүүхдээ сургуульд орохоос нь өмнө сургууль, багштай нь заавал танилцуулаарай. Хүүхдээ хичээлийн ширээн дээр суулгаж, жинхэнэ сурагч болох мэдрэмжийг амсуулах хэрэгтэй. Ордог хичээлүүд, хэр удаан үргэлжилдэг, хэдэн минутыг завсарлага авдаг талаар ч ярьж өг. Мөн сургуулийн хашаа, гуанз, хувцасны өлгүүр зэргийг үзүүлээрэй. Ингэснээр хүүхэд есдүгээр сарын 1-нд танихгүй орчинд орж, гэрэвшихгүй. Сургуулиар хийсэн аяллын дараа хүүхдээсээ заавал сэтгэгдлийг нь асууж, юуг нь өөрчлөхийг хүсэж байгааг хэлүүлээрэй.

Зөвлөгөө №7: Хувийн ариун цэвэр ч чухал

Хүүхдээ халдварт өвчнөөс урьдчилан сэргийлж амны маск зүүлгэж хэвших, хувийн ариун цэврийн үндсэн зарчмуудыг хэвшүүлээрэй. Хоол идэхээс өмнө, гадуур гараад ирэхдээ болон бие зассаны дараа гараа угааж сурсан байх ёстой. Тэгж чадвал та хүүхдээ халдвар өвчнөөс хамгаалж, биеэ дааж сургана гэсэн үг.

Зөвлөгөө №8: Тав тухтай байдлыг нь ханга

Хүүхэд аюулгүй байдлыг мэдрэхээр гэрийн тав тухтай орчин бүрдүүлж өгөх хэрэгтэй. Ямар ч үед хүүхдээ шүүмжилж, түүний чадварт эргэлзэх хэрэггүй.

Эцэг эхчүүд хүүхдээ сургуульд орохоос өмнө өөртөө итгэлтэй болоход сургаж, шинээр гаргасан амжилт бүрийг нь сайшааж магтаж байгаарай. Мөн хүүхэд өөрийн гэсэн үзэл бодолтой болж сурах нь чухал. Түүнтэйгээ цагийг аль болох хамт өнгөрөөх нь тустай.

Зөвлөгөө №9: Өөрийн болон бусдын аюулгүй байдлыг хангаж сургах

Сургууль орчны авто замын хөдөлгөөн бол хүүхдэд эрсдэл учруулж болох хамгийн аюултай хэсэг. Ногоон, гэрэл цагаан шугам, авто замаар болон бусад газарт ч болгоомжтой явах, хүүхдээ 6 дугаар анги хүртэл хүргэж өгч, буцааж авч байхад онцгой анхаар. Мөн бусад хүүхдэд хүндэтгэлтэй, хэн нэгний эрхийг зөрчихгүй байх, хүүхдүүдтэй хэрүүл, зодоон хийхгүй байх, багшидаа хүндэтгэлтэй хандах зэрэг харилцааны ур чадвар, санамжийг хүүхдэдээ байнга өгч байгаарай. Шар хантаазтай томчууд бол чамд туслах сургуулийн цагдаа шүү гэдгийг ойлгуулах. Аюул тохиолдсон үед багш, сургуулийн эргүүл, томчуудаас шууд тусламж хүсэж бай, эцэг, эхээс нуух зүйл гэж байхгүй гэдгийг ойлгуулах нь чухал.

Хүүхэдтэйгээ хамт суралцаж, гарч болох хүндрэл бэрхшээл бүрийг нь хамтдаа шийдвэрлэж, түүнийхээ сайн туслах, найз нь байгаарай.