Багшийн цалинг нэмүүлэх түр хороо нь 2017 оны наймдугаар сарын 10-ны өдөр нийслэлийн багш нарын төлөөлөл хуралдан 13 хүний бүрэлдэхүүнтэй байгуулдсан бөгөөд ерөнхий зохицуулагчаар Ц.Мөнхтуяа, дэд зохицуулагчаар Б.Бат-Эрдэнэ нар сонгогдон цалинг нэмэгдүүлтэл тэмцэхээр үйл ажиллагаагаа эхлүүлсэн байна. Уг Түр хороог байгуулснаас хойш цалин нэмүүлэх шаардлагыг хөдөө, орон нутаг, нийслэлийн хэмжээнд нэгэн дуугаар дэмжиж, хамтран ажиллах гарын үсэг цуглуулснаар Монголын олон мянган багш нарыг нэгтгэсэн том хөдөлгөөн болоод байгаа юм.

Тэд МҮЭХ-ны удирдах хүмүүстэй зөвлөлдөж, хамтарч ажиллах, цалин нэмүүлэх тэмцлээ эрчимжүүлж Түр хороог Хөдөлмөрийн дээд сургуулийн байранд байрлан ажиллах бололцоог гаргаж үйл ажиллагааг нь дэмжиж байна. Багшийн цалин нэмүүлэх шаардлагыг Түр хорооноос Засгийн газарт /2017.08.17 болон 2017.08.30/ хоёр ч удаа хүргүүлсэн юм. Улмаар есдүгээр сарын 21, 26-нд багш нар цалингаа нэмүүлэх нэн шаардлагатай байгааг илэрхийлэн орон даяар сануулах ажил хаялт зохион байгуулж, цаашдаа тэмцлийн хурц хэлбэрт шилжин тэмцэхээ төр, засгийн түшээдэд анхааруулж, эв нэгдлээ илэрхийлсэн. Харин энэ удаа Онц Их хурал хуралдуулж, багшийн цалин нэмүүлэх тэмцлийн цаашдын зорилтоо тодорхойлохоор зорьж байна.