Монгол Улсын Шадар сайдын баталсан удирдамжийг хэрэгжүүлэх ажлын хүрээнд нийслэлийн нутаг дэвсгэрт байршилтай Боловсролын байгууллагуудад гамшгаас хамгаалах болон гал түймрийн улсын хяналтыг хэрэгжүүлэх төлөвлөгөөт шалгалтыг 2017 оны 03 дугаар сарын 01-ний өдрөөс 03 дугаар сарын 27-ны өдрүүдэд зохион байгууллаа.

Шалгалтаар нийт 129 объект хамрагдаж, галын аюулгүйн норм дүрэм, стандартын заалтыг хэрэгжүүлээгүй 697 зөрчил илрүүлжээ. Үүнээс 103 зөрчил буюу 14.7 хувийг газар дээр нь арилгуулжээ.

Харин бусад зөрчлүүдийг арилгуулахаар Гал түймрийн улсын хяналтын байцаагчийн заавал биелүүлэх албан шаардлага 83, мэдэгдэл 37, танилцуулга 5, дүгнэлт 2-ыг бичиж, байгууллагын шийдвэр гаргах эрх бүхий албан тушаалтанд хүргүүлэн, хэрэгжилтэд нь хяналт тавин ажилласан байна.

Монгол Улсын Гамшгаас хамгаалах тухай, Галын аюулгүй байдлын тухай хуулийн талаар шалгалтад хамрагдсан Боловсролын байгууллагуудын албан тушаалтан нарт сурталчилж, хууль тогтоомжийг сахин биелүүлэх, галын аюулгүй байдлын норм, нормативын шаардлагыг дагаж  мөрдөж ажиллах талаар мэргэжил арга зүйн заавар зөвлөгөөг өгчээ.

Бага насны хүүхдийн аюулгүй байдлыг хангах, гамшгаас урьдчилан сэргийлэхийн тулд цэцэрлэг сургуулийн багш нар, эцэг эхчүүд, томчуудын оролцоо хамгийн чухал юм.

Эх сурвалж: НОБГ