Орхон аймгийн алслагдсан багуудын нэг Говил багийн 2-р сургуульд 500 гаруй хүүхэд суралцдаг аж. Уг нь тус сургуульд 600 хүүхэд сурах ёстой гэсэн тооцоо байдаг ч бусад 100 хүүхэд нь өвлийн хүйтэнд 5-8 км алхаж сургуульдаа очдог тул хичээлээ таслах, сургууль завсардах эсвэл өөр сургуульд сурах тохиолдлууд цөөнгүй.

Иймд Орхон аймгийн удирдлагууд энэ оныхоо төсөвт сурагчдын автобусанд зориулах 100 сая төгрөг суулган, хоёр автобус худалдаж авсныхаа нэгийг Говил багийн 2-р сургуулийн мэдэлд шилжүүлэн өгчээ.

Хүлээлгэн өгсөн автобус 233 хүүхдийн суудалтай бөгөөд 2-р сургуулийн бага ангийн сурагчдыг зөөх юм. Автобусны ашиглалт хамгаалалтын асуудлыг Хот тохижуулах газар хариуцах бөгөөд явах чиглэл маршрут, цагийн хуваарийг боловсролын газраас удахгүй баталж өгөх аж.