БСШУЯ-ны Сургалтын төрийн сангийн ахлах мэргэжилтэн С.Дэлгэрмаагаас үндэсний тэтгэлгийн талаар тодрууллаа. 

-Үндэсний тэтгэлгийг 3.0-оос дээш голчтой оюутнуудад олгохоор болсон гэх юм. Энэ талаар тодорхой мэдээлэл өгнө үү? 

-Засгийн газрын хуралдаанаар Ерөнхий сайд Ч.Сайханбилэг оюутнуудад үндэсний тэтгэлгийг олгохдоо сурлагын чанарыг харж олгоно гэж ярьсан. Одоохондоо БСШУЯ болон Сургалтын төрийн санд энэ талаар ямар ч мэдээлэл ирээгүй. Хэрэв тогтоол нь гарчихвал журмынхаа дагуу дүнгийн голч оноо нь хүрэхгүй байгаа оюутнуудыг хасна. Нэг үгээр хэлэхэд оюутнуудад олгодог үндэсний тэтгэлгийн шалгуур өндөр болж байна. Улсын төсөв хүнд байгаа энэ үед ийм шийдвэр гаргах нь зөв. Улсын төсөвт хэмнэлт хийгээд амжилттай суралцдаг оюутанд олгох хэрэгтэй. Түүнээс биш хичээл хийдэггүй, муу сурдаг оюутнуудад ард түмний татварын мөнгийг өгөх хэрэггүй.

 -Дүнгийн 2.0 голчоос дээш суралцсан оюутнуудад 70.200 төгрөг олгосон. Нийт хэчнээн оюутан тэтгэлэг авсан бэ? 

-Монгол Улсын хэмжээнд 2013-2014 оны хичээлийн жилд 165 мянган оюутан үндэсний тэтгэлэг авсан. Харин энэ хичээлийн жилд 45 мянган оюутанг хасч, 121 мянга гаруй оюутанд 70200 төгрөг олгосон. Дүнгийн голч 2.0 гэдэг нь оюутнуудын хувьд өндөр үзүүлэлт биш. Тасалсан, муу сурдаг оюутнууд хасагдсан. 

-Оюутнуудад тэтгэлгийг нь олгоод дууссан уу. Зарим сургуулийн оюутнууд тэтгэлгээ аваагүй гэх юм.Энэ ямар учиртай вэ?

 -Одоогоор дөрвөн сургуулийн оюутнуудын дансанд мөнгө байршаагүй байгаа. МУИС-ийн хоёр салбар, АШУҮИС, Монголын үндэсний их сургуулийн оюутнууд тэтгэлгээ аваагүй. Бусад сургуулийн оюутнууд тэтгэлгээ авсан. Сангийн яам санхүүжилтгүй болоод оноос өмнө олгож чадаагүй. Энэ сарын 15-н гэхэд дээрхи сургуулийн оюутнуудын дансанд тэтгэлгийн мөнгийг байршуулна.