Их Монгол улс байгуулагдсны 808, АХ-ын 93 жилийн ойн баяр цэнгэл наадмын хурдан хөөрхөн дааганы уралдаан өнөө өглөө боллоо. Газар газрын 234 ирээдүйн түмэн эхүүд тоосоо өргөж, Говь-Алтай аймгийн Шарга сумын уугуул, Тод манлай уяач Хадбаасангийн Бат-Эрдэнийн өсгий цагаан хээр даага түрүүлэн ирж түмэн олноо баясгалаа.Харин аман хүзүүнд Төв аймгийн Бүрэн сумын уугуул Хүрэлбаатарын Улам-Өрнөхийн хээр хурдалсан. Айргийн гуравт Говь-Алтай аймгийн Баян-Уул сумын уугуул, Тод манлай уяач Дагвадоржийн Ганбаатарын хар бор, айргийн дөрөвт Сүхбаатар аймгийн Халзан сумын уугуул, аймгийн Алдарт уяач Жалбасүрэнгийн Бат-Эрдэнийн хул, айргийн тавд Өмнөговь аймгийн Даланзадгад сумын уугуул, аймгийн Алдарт уяач Бадамгаравын Бадраагийн хүрэн зээрд даага тус тус хурдалсан байна.

Дараагийн байруудад орсон даагануудыг танилцуулбал:
6.Булган аймгийн Гурванбулаг сумын уугуул, Манлай уяач Дамбын Хишигжаргалын хүрэн халзан.
7. Сүхбаатар аймгийн Эрдэнэцагаан сумын уугуул Шүхэртийн Лхамсүрэнгийн саарал.
8. Говь-Алтай аймгийн Дарви сумын уугуул Сэр-Одын Нэргүйбаатарын хээр.
9. Өмнөговь аймгийн Ханбогд сумын уугуул, аймгийн Алдарт уяач Нэргүйн Амарбаясгалангийн зээрд.
10. Булган аймгийн Бугат сумын уугуул Р.Мягмардоржийн шарга.