Төрийн байгууллагууд төсвийн хөрөнгийг хэрхэн захиран зарцуулж байгаа талаарх мэдээллийг “Шилэн данс”-наас цувралаар хүргэж байгаа билээ. Энэ удаа Сүхбаатар дүүргийн Засаг даргын Тамгын газрын “Шилэн данс”-ны мэдээллийг онцолж байна.

Сүхбаатар дүүргийн Засаг дарга М.Алтангэрэл албан бичиг хүргүүлэх нэрийдлээр ХАГАС ТЭРБУМ төгрөг зарцуулжээ.

Тодруулбал, энэ оны наймдугаар сард албан бичгийн хүргэлтийн төлбөрт гэх нэрээр 534,375,000  төгрөгийг "Монгол шуудан" ХК-ийн дансруу шилжүүлсэн байна.

Гэвч уг гүйлгээний хавсралт мэдээлэлд хэдэн удаагийн хүргэлт хийсэн, ямар хугацаанд, ямар хэмжээний шуудангийн үйлчилгээ авсан зэрэг дэлгэрэнгүй мэдээллийг тусгаагүй байна. 

Өөрөөр хэлбэл, төсвийн 534.3 сая төгрөгийн зарцуулалт хийгдсэн боловч тухайн гүйлгээний талаарх мэдээллийг “Шилэн данс”-д бүрэн, тодорхой мэдээлээгүй гэсэн үг.

Төсвийн хөрөнгөөр хийгдсэн ийм хэмжээний зарцуулалтад юунд, хэдий хэмжээний үйлчилгээ авсан нь ил тод, ойлгомжтой байх учиртай. Иймд дээрх 534.3 сая төгрөгийн зарцуулалтын дэлгэрэнгүй мэдээлэл олон нийтэд нээлттэй байх шаардлагатай юм.