Нийслэлийн Иргэдийн Хурлын төлөөлөгчөөр сонгогдож, иргэдийнхээ асуудлыг шийдэх хүмүүс давхар дээлтэй болоод удаж буй. 

Тодруулбал, тэдний нэг бол газрын албанаас хотын менежер болсон НИТХ-ын төлөөлөгч Г.Батзориг. Түүний хувьд Улаанбаатар хотын Ерөнхий менежер-Захирагчийн ажлын албаны дарга,  "Хот төлөвлөлт, судалгааны институт” НӨҮГ-ийн Удирдах зөвлөлийн дарга, НИТХ-ын төлөөлөгч гэх зэргээр ГУРВАН ДАВХАР ДЭЭЛТЭЙ болж буй.

Дүүргийн Газрын харилцааны албанд газар зохион байгуулагч байсан тэрээр сүүлийн 5 жилийн дотор  крандуулсаар хотын бүх өнгөтэй албан тушаалуудыг сэлгэж дуусгасан дардан намтартай  Г.Батзориг шиг төлөөлөгч НИТХ-д лав байхгүй.

Тэгвэл "Давхар дээлтэй" Г.Батзориг төлөөлөгчийн 2024 онд АТГ-т шинэчлэн мэдүүлсэн ХОМ-ийг хүргэж байна. 

Тэрээр 2020 онд 17 сая төгрөгийн орлоготой байсан бол 2024 онд 37 сая төгрөг болж нэмэгдэн, харин  гэр бүлийн орлого нь 0 төгрөг байсан баримтыг хөрөнгө орлогын мэдүүлгээс нь харж болно.

Харин 2019 онд нийт хөрөнгө 77 сая төгрөг байсан бол 2024 онд жилийн орлого нь 37 сая төгрөг, 580 сая төгрөгөөр үнэлэгдэх нийтийн орон сууц, хаустай болжээ. Мөн 540  сая төгрөгийн малтай, эзэмших, өмчлөх эрхийн хоёр газартай болж, нийт хөрөнгө нь 1,1 гаруй тэрбум төгрөг болсон байна.

Өөрөөр хэлбэл, хөрөнгө нь таван жилийн дотор 10 дахин өсөж, тэрбумтан болсон гэсэн үг.

Тэрбээр мэдүүлэгтээ:

Өөрийн орлого: ₮37 сая
Гэр бүлийн орлого:  ₮0 сая
Хөрөнгө борлуулсны орлого: ₮0 сая
Орон сууц барилга байгууламж: ₮580 сая  /Орон сууц-1, Амины орон сууц-1/
Тээврийн хэрэгсэл: ₮0 сая
Мал аж ахуй: ₮540 сая /Үхэр-89, Адуу-160, Адуу-20/
Газар: ₮30 сая /Эзэмших-700м2-1, Өмчлөх-3074м2-1 нийт хоёр ГАЗАРТАЙ /

Үнэт эдлэл, урлаг, түүхийн үнэт зүйл: ₮0 сая
Хадгаламж: ₮16 сая 
Авлага: ₮0 сая
Зээл:  ₮30 сая гэж мэдүүлжээ.

₮8 саяар үнэлэгдэх орон сууцаа дөрөвхөн жилийн дотор 580 сая төгрөгийн үнэлгээтэй орон сууц, хаус болгож, 180 адуутай болох аргаасаа цалингаараа амьдардаг жирийн иргэддээ заагаад өгчихвөл улс эх орны ирээдүйд хэрэгтэй л юм даа!

Ташрамд дурдахад, 2024 оны 10-р сард орон нутгийн ээлжит сонгуулиар НИТХ-д 45 төлөөлөгч сонгогдсон. Тус 45 мандатын 40-ийг нь МАН авсан бол үлдсэн 5-ыг нь АН авсан байдаг. Үүнээс хойш НИТХ-ын төлөөлөгчид ээлж, дараалал нийслэлийн харьяа газруудад томилогдох болсон. Тэгвэл өнөөдрийн байдлаар нийт 26 төлөөлөгч давхар дээлтэй болоод байна.