Баянзүрх дүүрэг, 13-р хороолол буюу Зүүн дөрвөн замын автобусны буудлын урд талд байрлах шатсан “East” төвийг нураагаад, улмаар тухай газарт цэцэрлэгт хүрээлэн байгуулах санаачилга гаргаж байв.

Өмнө нь тус газарт Манжийн төрийн үеийн “Бат цагаан” нэртэй шорон байжээ. Тус шоронд гамингууд Монголын эх оронч баатар Манлай баатар Ж.Дамдинсүрэн, Д.Бодоо, С.Данзан нарыг хорьж байв. Түүнчлэн 1930-аад онд Д.Нацагдорж, Б.Ренчин, С.Буяннэмэх, Д.Намдаг нарыг тус шоронд хорьж байсан. 1950-аад оны сүүлчээр шоронгийн үйл ажиллагаа зогсож, арьс өнгөний эмнэлэг болсон бол 1990-ээд оны үед барилга нь муудсан тул сууриар нь нураасан байна. Улмаар “East” төв гэх худалдаа, үйлчилгээний байгууламж бий болж байжээ.

Энэхүү түүхийг үндэслэн эх орныхоо тусгаар тогтнолын төлөө амиа өргөсөн баатарлаг эрсийн дурсгалд зориулсан цэцэрлэгт хүрээлэн байгуулах саналыг 2022 оны зургадугаар сард Д.Сумъяабазар Нийслэлийн Засаг дарга байхдаа гаргаж эзэмшигч аж ахуйн нэгж байгууллагын удирдлагыг хэлэлцээрийн ширээнд урьж, попорч байв.

Харамсалтай нь тухайн газарт өдгөө 20 гаруй давхар худалдаа, үйлчилгээний талбайтай  “Хар Хорум” виллаж хотхон сүндэрллээ.

Шатсан барилгыг нураах шийдвэр гаргахаас гурван сарын өмнө буюу 2022 оны дөрөвдүгээр сард тус газрын  эзэмшигч болох “Пром-Импорт” ХХК гурван блок буюу 16 давхар худалдаа, үйлчилгээний цогцолбор байгуулахаар архитектур төлөвлөлтийн даалгавраа /А даалгавар/ батлуулж байжээ. 

Тэгэхээр тухайн үед Д.Сумъяабазар үүнийг мэдсээр байж төсвийн мөнгөөр тус газрын хуучин барилгыг нурааж, чөлөөлсөн  бөгөөд  тэд 2022 онд  Нийслэлийн Засаг дарга байсан Д.Сумъяабазараас орон сууц барих зөвшөөрөл авч, 2024 онд зөвшөөрлөө сунгуулсан  байсан аж.

“Пром-Импорт” ХХК-ийн эзэмшигч нь Ө.Галцог. Өмнө нь тус компанийг Хадбаатарын Золжаргал гэж нэр дээр байсан ч одоо Ө.Галцог эзэмших болжээ. Харин Ө.Галцог нь тус компанийг дангаараа эзэмшдэг ч Шатарбатын Удаанжаргал гэх хүнтэй хэд хэдэн компанийг эзэмшдэг байна. Тухайлбал, “ЖБНД” ХХК, “Эх газрын үр” ХХК зэрэг компаниудыг эзэмшдэг бөгөөд тэдний эзэмшлийн компаниуд барилга, газар тариалан, автомашины худалдаа, гадаад худалдаа, мэдээлэл технологи зэрэг олон төрлийн үйл ажиллагаа эрхэлдэг байна.