Энэ жилийн аялал жуулчлалын улирлыг эхлүүлж, 4-р сарын 8-14-ний өдрүүдэд “UB food” фестивалийг төв талбайд зохион байгуулна. Энэ удаагийн фестивалиар Бүгд найрамдах Узбекистан улсын хоолны амт, соёлыг онцлохын зэрэгцээ монгол хоолны соёлыг түгээхээр болж буй.

Өдөрлөгийн арга хэмжээ өдөр бүр 12:00- 21:00 цаг хүртэл үргэлжилнэ.

Энэ талаар Хотын дарга Х.Нямбаатар "Улаанбаатар хотод аялал жуулчлалын гол улирал 6, 7 дугаар сар байдаг ч 4, 5, 8, 9 дүгээр сард аялал жуулчлалыг татах арга хэмжээнүүд зохион байгуулахаар төлөвлөж байна. Тухайлбал ирэх долоо хоногт дөрөвдүгээр сарын 8-ны Мягмар гарагаас эхлэн 14-ний өдрүүдэд “UB food” фестиваль олон улсын хоолны өдөрлөгийг зохион байгуулахаар төв талбайд 4,000 хүний багтаамжтай  асар байгуулж байна.

Асар дотор Узбек улсын үндэсний хоол, монгол уламжлалт гурилтай шөл бусад хоолоор нийслэлчүүдэд болон ажлаар, аялал жуулчлалаар ирсэн хүмүүст үйлчилнэ.

Узбекистан улсын Ташкент хотын мастер тогооч нар өдөр бүр 12:30 цагт 2-3 тонн узбек плов үйлдвэрлэж гаргана.

Үүнээс гадна самса, лагма, шашлык зэрэг олон төрлийн хоолыг хийж үйлчлэх юм. Иргэд асарт орж узбек хоолоор үйлчлүүлэх бол 5,000 төгрөгийн төлбөр төлж хүссэнээрээ амтлах, идэх боломжтой." гэв.

UB food” олон улсын хоолны өдөрлөгийн үеэр уух зүйлсийн худалдаа зохион байгуулагдах бол урлаг, соёлын нэр бүхий хамтлаг, уран бүтээлчид тоглолтоо толилуулах юм байна.