Нийслэлийн төсвийн хөрөнгө оруулалтаар зам талбайн цэвэрлэгээ, үйлчилгээний зориулалттай нийт 5 төрлийн 33 машин, техникийг хүлээн авлаа.

Үүнд авто замын цас, мөсийг арилгаж, давс бодис цацах давхар үйлдэлтэй машин 10, авто замын цэвэрлэгээний шүүрт машин 8, авто замын цэвэрлэгээний вакум соруулагч машин 2, даралтат усаар зам угаагч машин 3, цас цэвэрлэгч шүүр, цас үлээгч бүхий бага оврын 10 ачигч машиныг хүлээн авч, Хот тохижилтын газар, дүүргүүдэд өгсөн байна.

БНХАУ-ын “Ченли” групп оруулж ирсэн эдгээр машин, техникийг эрс тэс уур амьсгалд 4 улирлын турш ашиглах боломжтой юм. Цас соруулдаг машин цас соруулахаас гадна дотроо 7-10 тонн давс бодисын нөөцийн савтай, давсыг автоматаар буталж цацдаг. Мөн гаргуурын төхөөрөмжөөрөө 12 метр хүртэл газарт давс цацдаг. Зам угаагч машин 10 тонны усны нөөцийн савтай, шороо босгохгүйгээр бага усаар, өндөр даралтаар их талбайг цэвэрлэдэг аж.

НЗДТГ-аас энэ онд 80 гаруй машин, техник шинээр авахаар төлөвлөж, хамгийн сүүлд гэхэд модны навч зэрэг хөнгөн юмсыг соруулах зориулалттай 46 шинэ тоног төхөөрөмжийг нийлүүлжээ.