"Баянгол дүүргийн Иргэдийн төлөөлөгчдийн хурлын отгон чуулган өнөөдөр боллоо. 

Дүүргийн ИТХ-ын дарга Б.СЭМЖИДМАА "2020-2024 онд Баянгол дүүргийн ИТХ-аас дүүргийнхээ 69 мянган өрх, 270 гаруй мянган оршин суугчдынхаа амьдрах орчныг сайжруулах, сурч боловсроход нь чиглэсэн олон шийдвэрүүдийг гаргаж, төсвийг нь батлан, хэрэгжилтэд хяналт тавьж ажилласан. 
Үүний үр дүнд :

• Төрийн үйлчилгээг иргэддээ түргэн шуурхай, хүртээмжтэй хүргэх зорилгоор дүүргийн 25 хороог 34 хороо болгон нэмэж, 4 хорооны байрыг шинээр ашиглалтад оруулсан
• Эрүүл мэндийн анхан шатны тусламж үйлчилгээг цаг алдалгүй хүргэх үүднээс 3 хороонд ӨЭМТ-ийг шинээр, хүн ам ихээр төвлөрсөн 6 хороонд ӨЭМТ-ийн салбар эмнэлгийг шинээр нээсэн
• Боловсролын чанар, хүртээмжийг нэмэгдүүлэх зорилгоор 2021-2023 онд нийт 6 сургууль, 10 цэцэрлэг ашиглалтад оруулсан бол 2024 онд 3 цэцэрлэг, 2 бага сургууль, цэцэрлэгийн цогцолборыг ашиглалтад оруулахаар ажиллаж байна.

Мөн хөрөнгө оруулалт,бүтээн байгуулалтын чиглэлээр :

• Нийт 45 байршилд 60,6 км авто зам,
• 34 хорооны 178 байршилд тоглоомын талбай, тохижилт,
• 34 хорооны 78 байршил, 59,772мкв талбайд явган хүний зам,
• 28 хорооны 118 байрны дээвэр засвар,
• 18 хорооны 52 байрны фасад дулаалга,
• 25 хорооны 76 байрны цахилгаан шат,
• 17 хорооны 233 байршилд 423 ширхэг камер,
• 80 байршилд 761 ширхэг гэрэлтүүлгийг тус тус шинээр хийсэн." хэмээлээ.