Олон улсын хүүхдийн эрхийг хамгаалах өдрийг тохиолдуулан нийслэлийн Засаг даргын захирамжийн дагуу зургаадугаар сарын 1-ний өдөр зарим чиглэлд авто замын хөдөлгөөнийг хязгаарлана.

Тодруулбал, Сүхбаатарын талбайн баруун, зүүн тал, Монголын хүүхдийн ордноос Шангрилагийн уулзвар хүртэл, Ус, цаг уурын хүрээлэнгээс Төрийн ордны баруун талын уулзвар хүртэл, Галлериа худалдааны төвөөс Спортын төв ордон хүртэлх замыг 08:00-20:00 цагт түр хаах ажээ.

“Дэлхийн монгол хүүхэд” нэртэйгээр зохион байгуулах уг баяраар төв талбайд жижиглэн худалдаа, хоол хүнс зэрэг үйлчилгээг хоригложээ. Харин үзвэр үйлчилгээ, тэмцээн уралдааныг зохион байгуулах бөгөөд талбайн зүүн тал буюу “Туушин” зочид буудлын урд хэсэгт худалдаа, хоол хүнсний үйлчилгээг байршуулах юм.

Тэгвэл талбайн урд талд байрлах авто машины зогсоолд “Повер экспо” авто үзэсгэлэн болно. Баярын өдрөөр тодорхой чиглэл бүхий авто замын хөдөлгөөнийг хааж, хүүхэд багачуудын аюулгүй байдлыг хангахаар зохицуулалт хийнэ. Жил бүр уламжлал болгон зохион байгуулдаг шохойн зургийн уралдаан ч мөн болох аж.

Баярын өдрөөр “Power expo” авто машины үзэсгэлэн, урлаг, соёлын тоглолт, спортын зургаан төрлийн тэмцээн, “Хөгжлийн харандаа” инновацын үзэсгэлэн, E-спорт, Lego mindstorm, SIP зэрэг хөтөлбөрийн танилцуулга, хүүхдийн хөгжлийн тэмцээн уралдаан, хүүхэд хамгааллын үйл ажиллагааг зохион байгуулна.