Улаанбаатар хотын хэмжээнд хаврын их цэвэрлэгээг дөрөвдүгээр сарын 1-19-ний хооронд зохион байгуулж буй. Уг ажил энэ амралтын өдрүүдэд илүү эрчимжин, УБЗАА, дүүрэг, хороодын аж ахуйн нэгж байгууллагууд, СӨХ, их дээд сургуулийн оюутан залуусыг хамран, өргөн хүрээнд үргэлжилж байна.

Энэ талаар Захирагчийн ажлын албаны дарга Ц.Төрхүү “Бүх нийтийн их цэвэрлэгээ энэ амралтын өдрүүдэд эрчимтэй үргэлжилж байна. Цаашлаад хагас сайн өдөр бүр бүх нийтийн их цэвэрлэгээг тогтмолжуулна." гэв.

"Халтар хотоо угаана" гэж Хотын дарга Х.Нямбаатар бөөн сүр болж, уг ажлаа “Хаврын их цэвэрлэгээ” хэмээн нэрлээд буй юм. Мэдээж хотоо угаах нь зүйн хэрэг шүү дээ. Угаахгүй л бол Улаанбаатар бөөн тоос, шороонд дарагдаад, иргэдийн эрүүл, аюулгүй орчинд амьдрах эрх хэдийн алдагдчихаад байгаа билээ.

Гэтэл хотоо угаахыг бүх нийтийн ажил хэрэг болгож, хүн болгоныг татан оролцуулахыг санаархаж, социализмын үеийн субботникийн түвшинд аваачмааргүй байна.