Шинээр ирсэн автобуснуудыг үйлчилгээнд явуулахын тулд эзэнжүүлж, бүртгэлжүүлэхээс гадна хувийн хэвшлийн аж ахуйн нэгжүүдтэй эргэн төлөлтийг тохрох, төлбөрийн картын систем суурилуулах шаардлагатай байгаа. Энэ нь тодорхой хугацаа шаардаж байгаа бөгөөд нэн тулгамдсан асуудал нь жолооч нарын хүрэлцээгүй байдал юм. Үүнтэй холбоотойгоор, жолооч нарын цалинг 3.5 сая төгрөг болгож, хоёр ээлжээр ажиллах нөхцөлийг бүрдүүлэхээр болсон.

Мөн нийслэлийн автобус компанид ажиллаад тэтгэвэрт гарсан бол 24 сарын цалингийн урамшуулал олгохоор болсон.Иймээс B,C ангилалтай жолооч нарыг бэлтгэж, ажлын байраар хангана гэсэн. 

Тэгвэл Хотын дарга Х.Нямбаатар "Шуурхай хуралдаан дээр нийтийн тээврийн автобусны жолоочоор ажиллах хүсэлтэй залуучуудыг бүртгэж, мэргэшсэн жолоочоор сургах тухай мэдээлэл хүргэсэн. Нэг өдрийн дотор 9 дүүргийн Хөдөлмөр халамжийн үйлчилгээний хэлтсүүд дээр автобусны жолоочоор ажиллах хүсэлтэй 570 залуучууд бүртгүүлсэн" гэлээ.