Ипотекийн зээлийг Монголбанкнаас Засгийн газарт шилжүүлэхтэй холбоотойгоор тус зээлийг түр хугацаанд зогсоох эсэхэд Сангийн дэд сайд С.Мөнгөнчимэг мэдээлэл өглөө.

Тэрбээр "Мөнгөний бодлогын хүрээнд ипотекийн зээлийг Монголбанкнаас Засгийн газарт шилжүүлэх шийдвэр гаргасан. Энэ хүрээнд бэлтгэл ажлыг хангахаар Барилга хот байгуулалтын сайдын ахалсан ажлын хэсэг ажиллаж байна. Ажлын хэсгийн дүгнэлтээр ипотекийн зээлийн хүртээмжийг бууруулахгүйгээр Засгийн газарт үе шаттайгаар шилжүүлэхээр төлөвлөж байгаа. Цаашид үндэсний орон сууцны корпорац гэсэн бүтэцтэйгээр зохион байгуулна. Энэ талаар тодорхой дүрэм журмыг боловсруулж засгийн газрын хурлаар шийдвэрлүүлэх юм. Энэ оны эхний зургаан сарын байдлаар гурван мянга гаруй өрхөд ипотекийн зээлийг олгосон. Улмаар цаашид ч ипотекийн зээлийг үргэлжлүүлэн хэвийн олгоно" гэв.