Хотын дарга өнгөрөгч баасан гарагт болсон үерийн үеэр газар дээр нь ажиллах үедээ "Хэнтий аймгийн хоёр иргэн тогны хүчдэлээс болж нас бараагүй, гэртээ байж байгаад нас барсан юм билээ" хэмээчихэв. Гэртээ зүгээр сууж байсан хүн нас барахгүй нь тодорхой.

Гэтэл энэ хэргийг өөрөөсөө зайлуулах гэсэн мэт "тогны утаснаас болоогүй" ээ гээд хээв нэг яриад явчихав. Үүнээс гадна "Баянзүрх дүүргийн үерт өртсөн хороодын Засаг дарга нарыг ажлаас нь хална" хэмээх сүртэй мэдэгдлийг дараах өдөр нь хийв.

Угтаа үе үеийн Засаг дарга, газрын албадын замбараагүй газар олголтын асуудлыг хөндөх ёстой байтал одоо ажиллаж буй хэдэн Засаг дарга нарт хариуцлага тооцоод энэ удаагийн хэргийг аргалахаар шийдсэн бололтой. 

Өмнө нь болсон хоёр үер бидэнд хангалттай анхааруулга өгсөөр байтал хотын удирдлагууд "Газар дээр нь ажиллаж байна. Буулгана, суулгана" гэх сүржин үгсээр дарж, иргэдийг аргалсаар өнөөдрийн нөхцөл байдалд хүрэв.