Зайсан орчмын замын хөдөлгөөнд өөрчлөлт оруулах гэж буй талаар холбогдох албаныхан өнөөдөр нийслэлийн "Хангарди" ордонд мэдээлэл өглөө.

Нийслэлийн Засаг даргын Төсөл, хөтөлбөр хариуцсан зөвлөх Ч.Батзориг "Энэ оны нэгдүгээр сараас эхлэн Зайсан орчмын нэг чигийн хөдөлгөөнд өөрчлөлт оруулсан. Одоо урин дулааны улирал эхэлсэнтэй холбогдуулан хөдөлгөөний зохион байгуулалтад өөрчлөлт оруулах шаардлага үүслээ.

Тухайлбал, уг бүсэд барилга угсралтын ажлууд эхэлж, том оврын болон хүнд даацын машин, механизм зорчих шаардлагатай болсон. Иймд Зайсан орчмын зарим замд 23:00-06:00 цаг хүртэл эсрэг урсгал хийхээр төлөвлөж байна. Тухайлбал, Зайсангийн баруун болон хойд талаар явж байгаа замуудыг эсрэг урсгалтай болгоно. Ингэснээр тухайн замаар хүнд даацын машин, механизм зорчих боломж үүсэх юм. 

Тухайн бүсэд оршин суугчдын уур бухимдлыг хүргэж байгаа нэг асуудал нь хотхон руу ордог холбоос замын эвдрэл гэмтэл. Үүнтэй холбогдуулан Нийслэлийн авто замын хөгжлийн газраас 750 метр замыг зассан.

Харамсалтай нь энэ зам дээр дахин хөдөлгөөний ачаалал авсан учир хүнд даацын машин, механизм явуулах боломжгүй байна. Нийслэлийн авто замын газраас өргөтгөл шинэчлэлийг хийж, том оврын машин зорчих боломжтой болгох тал дээр ажиллаж байгаа" хэмээв.