Хөгжлийн бэрхшээлтэй хүний эрхийг хамгаалах олон улсын өдрийг тохиолдуулан Нийслэлийн хөдөлмөр, халамжийн газраас хөгжлийн бэрхшээлтэй хүүхдийн сурч боловсрох эрхийг хангах, нийгмийн харилцаанд тэгш, хүртээмжтэй оролцох оролцоог дэмжих зорилгоор “Шинэ боловсрол, шинэ технологи инновацын төв” НҮТББ-ын EDU TECH төвтэй хамтран орчин үеийн техник технологитой танилцах, туршилт хийх, танхимын бус аргаар хөгжүүлэх, зугаатай орчинд шинжлэх ухааныг танин мэдүүлэх зорилготой “ТОГЛОНГОО СУРАЛЦАХ” арга хэмжээг зохион байгууллаа.

Уг арга хэмжээнд Нийслэлийн Засаг даргын дэргэдэх Хүүхэд, залуучуудын сургалт, хүмүүжлийн тусгай цогцолбор болон Нийслэлийн ерөнхий боловсролын 63 дугаар сургуулийн нийт 31 хүүхэд хамрагдсан бөгөөд виртуал орчинд одон орон судлал болон хүний биеийн бүтцийн онцлогтой танилцаж, цахилгаан соронзон орны нөлөөллийг төхөөрөмж ашиглан туршилт хийх, 3D төхөөрөмж ашиглан зурсан зургаа хөдөлгөөнт дүрсэд хувиргах, Robomaster S1 төхөөрөмжин дээр хөдөлгөөнт тоглоом тоглон шинжлэх ухааны мэдлэгээ тэлж нэг өдрийг хөгжилтэй өнгөрүүллээ.

Нийгмийн хариуцлагын хүрээнд уг арга хэмжээг дэмжин ажилласан EDU TECH төв, “Гумуда гарден” ХХК-ийн хамт олон болон арга хэмжээг сурталчлан ажилласан хэвлэл, мэдээллийн байгууллагуудад талархал илэрхийлье.