Цар тахлаас шалтгаалж хоёр жил завсарлаад байсан танхимын сургалт 100 хувь дүүргэлттэй эхэллээ. Хонхны жингэнээ, хүүхдийн дуу цангинаж, эрдмийн их өргөө олны хөлд дарагдах танил мэдрэмж энэ өглөө угтлаа.

Хотын гудмаар шинэ дүрэмт хувцастай сурагчид, гартаа цэцэг барьсан эцэг, эхчүүд хаа сайгүй. Сургууль, цэцэрлэгийн эргэн тойронд өхөөрдсөн харцаар хүүхдээ ширтэн зогсох эцэг, эхчүүдийн хайр, шавь нараараа бахархсан эрдэмтэн, багш нарын баяр хөөрөөр бялхаж байна.

Энэ жил улсын хэмжээнд ерөнхий боловсролын сургуульд 746,653 сурагч эрдмийн үйлсэд шамдана. Харин сургуулийн өмнөх боловсролын тухайд өнөөдрийн байдлаар 113,474 хүүхэд цэцэрлэгт хамрагджээ.