Даншиг наадам Хүрээ цам 2022 шашин соёлын наадмыг ирэх наймдугаар сарын 6,7-нд Хүй долоон худагт зохион байгуулах тов гарчээ. Монголын шашин соёлын тус наадам хамгийн сүүлд цар тахлаас өмнө 2020 онд Гандантэгчинлэн хийдэд болж байв. 

Гэвч уг наадмыг зохион байгуулахтай холбогдуулан НЗДТГ-аас нэлээдгүй  зардал гардаг байна. Монгол Улс эдийн засгийн хүнд нөхцөлд байгаа энэ цаг үед Даншиг наадмыг зохион байгуулах тал дээр иргэд, олон нийт шүүмжлэлтэй хандаж байна. 

Өнгөрсөн долдугаар сард улсын хэмжээнд ард  иргэд наадамласан бол наймдугаар сард намар, өвлийн бэлтгэлээ хангах зэрэг тулгамдсан асуудлууд  Монголчуудыг хүлээж байгаа билээ. Түүнчлэн өнөөдрөөс эхлэн ХУД-ийн Хүннү Молл орчмын замыг хаасантай холбогдуулан Улаанбаатар хотод нэлээдгүй түгжрэл үүсээд буй. Даншиг наадамд зориулж татвар төлөгчдийн мөнгийг салхинд хийсгээд өнгөрөх үү, Д.Сумьяабазар дарга аа! 

Ирэх өвөл Хот тэр чигтээ хөлдөх аюулд ойрхон байгааг мэргэжилтнүүд хэлж байна. Эрчим хүчний салбар 20 хувийн нөөц чадалтай байх ёстой. Гэвч манай эрчим хүчний салбар 20 хувийн дутагдалтай явдаг.  Ийм дутагдалтай тул өвөл хөлдөх бодит нөхцөл үүссэн нь үнэн хэмээн албаныхан мэдээлж байна. Энэ тал дээр Засгийн газар,  Улаанбаатар хотын захиргаа яаралтай анхаарах болсон. Гэтэл бид дахиад Нийслэлчүүдийнхээ цагийг түгжрэлд уян Хүй 7 худагт Даншиг наадам зохион байгуулна гээд сууж байх нь хэр зохиостой вэ?!