Сүхбаатарын талбайн урд хэсэг буюу 1.6 га талбайг хамардаг Хонхтой цэцэрлэгт хүрээлэнгийн тохижилтыг 80 хоногийн турш хийж дуусган үйл ажиллагааг нээсэн гэж Хотын дарга С.Амарсайхан мэдээллээ.

Тус цэцэрлэгт хүрээлэн 85 м урт, 14 метрийн өргөнтэй аялгуут усан оргилуур, 800 м/кв хэмжээтэй дугуйн талбай, 35 хүнд нэг дор үйлчлэх боломжтой хоёр ариун цэврийн байгууламжтайгаас гадна иргэдийн амарч, зугаалах орчныг бүрдүүлэх тохижилтуудыг хийсэн байна. Мөн цэцэрлэгийн ногоон байгууламж бүхэлдээ автомат усалгааны системээр тоноглогдсон нь амжилт болж байгаа юм.

Түүнчлэн “Хонхтой” цэцэрлэгт хүрээлэнд байршсан “Амны ус” гэх бүтээн байгуулалт нь баруун, зүүн хоёр захад байршсан  бөгөөд гаднын орнуудад элбэг тааралддаг бүтээн байгуулалт.  Иргэдэд гэнэт ам нь цангах, эсвэл амаа зайлмаар болох шаардлага гарахад “Амны ус” тус болдог аж.

Цэцэрлэгт хүрээлэнг тохижуулах ажил дөрөвдүгээр сарын 1-нд эхэлсэн бөгөөд тендер зарлалгүй Нийслэлийн хот тохижилтын газар ОНӨААТҮГ хийсэн юм.